اقمولا وبلىسى دەنساۋلىق ساقتاۋ باسقارماسىنىڭ مالىمەتىنشە، اقمولا جانە سولتۇستىك قازاقستان وبلىستارىنىڭ باسقارمالارى اراسىنداعى توتەنشە جاعدايدا شۇعىل مەديتسينالىق كومەك كورسەتۋ تۋرالى كەلىسىم شەڭبەرىندە كوكشەتاۋ قالاسىنان سانيتارلىق اۆياتسيا دارىگەرلەرى تايىنشا اۋدانىنىڭ تۇرعىندارىنا كومەككە باردى.
ءوڭىردىڭ سانيتارلىق اۆياتسيا جەلىسىنە جۇكتىلىكتىڭ 28 اپتاسىنداعى ايەلدى شۇعىل كەسار تىلىگى ارقىلى بوساندىرىپ الۋ جونىندە شاقىرتۋ تۇسكەن. ايەل ەكى بالانى دۇنيەگە اكەلگەن، ونىڭ ءبىرى سالماعى 930 گرامم ۇل بالا دا، ەكىنشىسى سالماعى 900 گرامم قىز. مەرزىمىنەن بۇرىن تۋعاندىقتان نارەستەلەردىڭ ەكەۋىنىڭ دە سالماعى تومەن جانە تىنىس الۋىندا قيىندىقتار بولعان.
شاقىرتۋ بويىنشا نەوناتولوگ - دارىگەر تاتيانا شافيگينا مەن مەدبيكە مارينا چەرەپاشكوۆا شۇعىل تۇردە كومەككە باردى. دارىگەرلەر ۇل بالانى جاعدايى تۇراقتالعان سوڭ كوكشەتاۋ قالاسىنداعى اقمولا وبلىستىق كوپەيىندى اۋرۋحاناسىنىڭ پەريناتالدىق ورتالىعىنا الىپ كەلدى. ال ونىڭ سىڭارى تايىنشا اۋداندىق ورتالىق اۋرۋحاناسىندا جەرگىلىكتى دارىگەرلەردىڭ باقىلاۋىمەن ەم قابىلداۋدا. قىز بالانىڭ دەنساۋلىعى بويىنشا بىلىكتى دارىگەرلەر تاۋلىك بويى كونسۋلتاتسيا جاساۋدا.
«وسىنداي توتەنشە جاعداي كەزىندە دارىگەرلەردىڭ ىنتىماقتاستىعى مەن كاسىبيلىگى ءوزارا كەلىسىلگەن ءىس-قيمىلداردىڭ ماڭىزدىلىعىن ءبىلدىرىپ قويمايدى، سونىمەن بىرگە، وڭىردەگى مەديتسينالىق كومەكتىڭ جوعارى دەڭگەيدە ەكەنىن كورسەتەدى»، - دەيدى اقمولا وبلىسى دەنساۋلىق ساقتاۋ باسقارماسىنىڭ ءباسپاسوز حاتشىسى كاميلا ءابدىلمانوۆا.
