سوت ءبىلىم جانە عىلىم ۆيتسە-ءمينيسترىن كىنالى دەپ تانىپ، 6 ميلليون تەڭگە ايىپپۇل سالدى
ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا پروتسەسسۋالدى كەلىسىمگە نە ءۇشىن بارعانىن ءتۇسىندىردى. بۇگىن ونى سوت زالىندا بوساتتى، دەپ حابارلايدى Sputnik قازاقستان تىلشىسى.
سوتتىڭ شەشىمىنە سايكەس، ۆيتسە-مينيستر مەملەكەتتىك مەكتەپتە جەكەمەنشىك ءبىلىم بەرۋ مەكەمەسىن اشىپ، كاسىپكەرلىك قىزمەتپەن اينالىسقانى ءۇشىن كىنالى دەپ تانىلدى. بۇدان بولەك، قىزمەتتىك وكىلەتتىلىگىن اسىرا پايدالانىپ، مينيسترلىككە قاراستى مەكەمەلەرگە ايفوندار مەن پلانشەتتەردى الدىرتقانى بار. وسى قىلمىستار ءۇشىن وعان 6 ميلليون تەڭگەگە جۋىق ايىپپۇل سالىندى.
"جەكە كاسىپكەرلىك جۇمىسقا قاتىستى ايتارىم، ول جۇمىس ءالى باستالعان جوق. ءيا، مەنىڭ تۋىسقاندارىم جەكەمەنشىك مەكتەپتى باسقارۋدى جوسپارلاعان. بىراق كرەديت ەندى عانا الىنىپ، راسىمدەۋ شارالارى جۇرگىزىلىپ جاتقان. جەكە مەكتەپ تەك قىركۇيەك ايىندا عانا اشىلادى دەگەن جوسپار بولدى. بىراق زاڭ بار. مەن ءوز كىنامدى مويىندادىم. دەگەنمەن، جوعارعى سوتتا ءالى شەشىم بولادى دەپ ويلايمىن، سوتتىڭ شەشىمىنە ءالى دە شاعىم تۇسىرەتىن بولامىن", - دەدى سۋحانبەرديەۆا جۋرناليستەرگە بەرگەن سۇقباتىندا.
بۇدان بولەك، ۆيتسە-مينيستر قىزمەتىن اسىرا پايدالانىپ، جەكە كاسىپكەرلەرگە ايفون مەن پلانشەتتەردى نەگە الدىرتقانىن دا ءتۇسىندىردى."ەندى، ءبارى بالالار ءۇشىن عوي. قازاقستاننىڭ تۇكپىر-تۇكپىرىنەن كوپبالالى وتباسىدان جانە جەتىم بالالار كەلدى. ولار ءبىر عانا كىتاپپەن كەتپەسىن دەپ پلانشەتتەردى الدىرتتىق. مەن جوعارعى سوتقا ارىز ءتۇسىرىپ، زاتتاي ايعاق رەتىندە تاركىلەنگەن ەكى ايفون مەن پلانشەتتەردى قايتارۋدى سۇرايتىن بولامىن. مەن ءوز جازامدى الدىم عوي. بالالار بولسا، ءوز سىيلىقتارىن الۋى قاجەت. قايتارماسا، بىردەڭە ويلاستىرامىن. مەملەكەت قارجىسىنان ءبىر تيىن الىنعان جوق. ال، ەرلىك جاساعان تاعى ەكى بالامەن سويلەسكەندە، "اپاي ۇيالى تەلەفون ارمانىم ەدى، سونى الىپ بەرسەڭىز" دەدى. ءبىر بالا ءۇش قارىنداسىن وتتان الىپ شىقتى. ەكىنشىسى ەكى جاسار بالانى قۇدىقتان الىپ شىقتى...", - دەدى سۋحانبەرديەۆا.
وسىدان كەيىن ۆيتسە-مينيستر سۇقباتتى ارى قاراي جالعاستىرا الماي، جىلاپ جىبەردى.
"ادىرنا" ۇلتتىق پورتالى
