مەملەكەت باسشىسى قاسىم-جومارت توقاەۆ شەتەلدە جۇمىس ىستەپ جۇرگەن عالىمداردى ەلگە شاقىردى. بۇل تۋرالى ول بۇگىن، 12 ساۋىردە ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ايتتى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«بۇگىنگى جيىندا شەتەلدىك عىلىمي ورتالىقتاردا تابىستى جۇمىس ىستەپ جۇرگەن عالىمدارىمىزدى قازاقستانعا قايتارۋ ماڭىزدى دەگەن پىكىر ايتىلدى. بۇل ۇسىنىستى قولدايمىن جانە وتانداستارىمىزدى ءوز زەرتتەۋلەرىن قازاقستاندا جالعاستىرۋعا شاقىرامىن. مەملەكەت ءوز تاراپىنان مۇنداي عالىمدارعا ۇيىمداستىرۋشىلىق تۇرعىدان جانە قارجىلاي ناقتى كومەك كورسەتەدى»،—دەدى ول.
پرەزيدەنت شەتەلدە جۇمىس ىستەيتىن عالىمداردى بۇعان دەيىن دە شاقىرعانىن اتاپ ءوتتى.
«وسى ماسەلەنى مۇقيات ويلاستىرۋ كەرەك. عىلىم ءوزىنىڭ اۋقىمى مەن سيپاتى جاعىنان جاھاندىق دەڭگەيدە بولعاندىقتان بۇل جەردە جالاڭ پاتريوتيزمگە بەرىلۋ ورىنسىز. ايتسە دە قازاقستان اقىل-ويدىڭ جاھاندىق باسىنەن تىس قالماۋى كەرەك.
وتە ءبىلىمدى ادامدار، سۇرانىسقا يە عالىمدار جاقسى جالاقى، زەرتتەۋگە قولايلى جاعداي ىزدەپ نەمەسە جاي عانا جاڭا تاجىريبە ءۇشىن باسقا مەملەكەتتەرگە ءجيى قونىس اۋدارادى. مىقتى عالىمداردىڭ كەلۋى ەلىمىزدىڭ دامۋىنا تىڭ سەرپىن بەرەدى ءارى ادامي كاپيتالدىڭ ساپاسىن ايتارلىقتاي جاقسارتۋعا ىقپال ەتەدى. مۇنى الەمدىك تاجىريبە انىق كورسەتىپ وتىر»،—دەپ تولىقتىردى توقاەۆ.
