Memleket basshysy Qasym-Jomart Toqaev shetelde jumys istep júrgen ǵalymdardy elge shaqyrdy. Bul týraly ol búgin, 12 sáýirde ótip jatqan Ǵylym jáne tehnologııalar jónindegi ulttyq keńestiń otyrysynda aıtty, dep habarlaıdy «Adyrna» tilshisi Aqordaǵa silteme jasap.
«Búgingi jıynda sheteldik ǵylymı ortalyqtarda tabysty jumys istep júrgen ǵalymdarymyzdy Qazaqstanǵa qaıtarý mańyzdy degen pikir aıtyldy. Bul usynysty qoldaımyn jáne otandastarymyzdy óz zertteýlerin Qazaqstanda jalǵastyrýǵa shaqyramyn. Memleket óz tarapynan mundaı ǵalymdarǵa uıymdastyrýshylyq turǵydan jáne qarjylaı naqty kómek kórsetedi»,—dedi ol.
Prezıdent shetelde jumys isteıtin ǵalymdardy buǵan deıin de shaqyrǵanyn atap ótti.
«Osy máseleni muqııat oılastyrý kerek. Ǵylym óziniń aýqymy men sıpaty jaǵynan jahandyq deńgeıde bolǵandyqtan bul jerde jalań patrıotızmge berilý orynsyz. Áıtse de Qazaqstan aqyl-oıdyń jahandyq básinen tys qalmaýy kerek.
Óte bilimdi adamdar, suranysqa ıe ǵalymdar jaqsy jalaqy, zertteýge qolaıly jaǵdaı izdep nemese jaı ǵana jańa tájirıbe úshin basqa memleketterge jıi qonys aýdarady. Myqty ǵalymdardyń kelýi elimizdiń damýyna tyń serpin beredi ári adamı kapıtaldyń sapasyn aıtarlyqtaı jaqsartýǵa yqpal etedi. Muny álemdik tájirıbe anyq kórsetip otyr»,—dep tolyqtyrdy Toqaev.
