الماتى قالاسىندا «DAULETTEN قايىرىمدىلىق قورى» ۇيىمداستىرعان قايىرىمدىلىق كەشتە ديماش قۇدايبەرگەننىڭ كوستيۋمى اۋكتسيوندا 2 000 000 تەڭگەگە ساتىلدى. بۇل تۋرالى «Dauletten» قايىرىمدىلىق قورىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
اتالمىش كوستيۋمدى تانىمال ءانشى اللا پۋگاچەۆانىڭ ماسكەۋدە وتكەن مەرەيتويىنا وراي ۇيىمداستىرىلعان «پوداروك دليا اننى» اتتى شىعارماشىلىق كەشىندە كيگەن. وندا ديماش يگور كرۋتويدىڭ «ليۋبوۆ، پوحوجايا نا سون» ءانىن ورىندادى. كوستيۋم ديزاينەرى – Atelier Leka.
قايىرىمدىلىق قورى تاراپىنان ۇيىمداستىرىلعان اۋكتسيوندا العاشقى لوتتىڭ باعاسى 500 000 تەڭگەدەن باستالدى. اۋكتسيون سوڭىندا كوستيۋم 2 000 000 تەڭگەگە ساتىلدى. بۇل لوتتى قازاقستاندىق كاسىپكەر، قارجىلىق ساۋاتتىلىق بويىنشا مەنتور ەركەبۇلان ءارىپباي ساتىپ الدى.
«مەن بۇل كوستيۋمدى ىنىمە سىيلايمىن. ول 11-سىنىپتى اياقتايىن دەپ جاتىر. ءوزى دە ديماش قۇدايبەرگەنگە ۇقسايدى. تۋىستارىمىزدىڭ ءبارى ونى ديماشقا ۇقساتادى»، - دەدى ول.
بۇل اتالمىش كەشتە 2 000 000 تەڭگەگە باعالانعان ەڭ ۇلكەن لوت بولدى. سونداي-اق، قايىرىمدىلىق كەشىندە «GGG فۋتبولكا» 1 000 000 تەڭگەگە، قازاقستاندىق ميني-فۋتبوليست، قايرات جانە قازاقستاننىڭ قۇراماسىنىڭ شابۋىلشىسى سەرىك جامانقۇلوۆ كيگەن فۋتبولكا 300 000 تەڭگەگە، «ورداباسى» فۋتبول كلۋبىنىڭ جانە قازاقستان ۇلتتىق قۇراماسىنىڭ كاپيتانى اسحات تاعىبەرگەننىڭ فۋتبولكاسى 300 000 تەڭگەگە ساتىلدى. اۋكتسيوندا مۇستافا وزتۇرىكتىڭ قولى قويىلعان كىتاپ تا بولدى.
ايتا كەتۋ كەرەك، «Dauletten قورى» تاراپىنان ۇيىمداستىرىلعان بۇل كەشتە جيىنى 7 000 000 تەڭگە جينالدى. اۋكتسيوننان جينالعان قاراجات قايىرىمدىلىققا جۇمسالماق. ەلىمىزدە بولىپ جاتقان سۋ تاسقىنى سالدارىنان زارداپ شەككەن وڭىرلەرگە گۋمانيتارلىق كومەك كورسەتىلەدى.
