تۇركىستان وبلىسىندا 29 جاستاعى كەلىنشەك قۇدىققا قۇلاپ قايتىس بولعانى تۋرالى اقپارات تارادى. مارقۇمنىڭ تۋىستارى الەۋمەتتىك جەلىدە بۇل جايتقا قاتىستى ءالى كۇنگە تەرگەۋ جۇمىستارى جۇرگىزىلمەي جاتقانىن ايتىپ نارازىلىعىن ءبىلدىردى، دەپ حابارلايدى «ادىرنا» ءتىلشىسى Otyrar.kz-كە سىلتەمە جاساپ.
قايعىلى وقيعا 18 ناۋرىزدا مايتوبە اۋىلى ماڭىندا بولعان. پوليتسيا ءىس «ءوزىن-ءوزى ولتىرۋگە دەيىن جەتكىزۋ» بابى بويىنشا تىركەگەنىن مالىمدەدى. قازىر تەرگەۋ جۇمىسى ءجۇرىپ جاتىر.
«قازىر «ءوزىن-ءوزى ولتىرۋگە دەيىن جەتكىزۋ»بابى بويىنشا تەرگەۋ جۇرگىزىلىپ جاتىر. ناتيجەلەرى بويىنشا زاڭدى پروتسەسسۋالدىق شەشىم قابىلدانادى»،–دەيدى تۇركىستان وبلىسى پد ءباسپاسوز قىزمەتى وكىلى.
40 مەتردەن اسا تەرەڭدىكتەن ارنايى قۇرالدارىمەن تارتىپ شىعارىلعان ايەلدىڭ تۋىستارى ونىڭ وزىنە قول جۇمساۋى مۇمكىن ەمەس دەپ سانايدى. سەبەبى قايتىس بولعان ايەلدىڭ باسىندا ىسىك پەن دەنەسىنىڭ كوگەرگەن جەرلەرى بولىپتى. سونىمەن قاتار، ءبىر ۋىس شاشى مارقۇمنىڭ قولىننان تابىلعان. ال كۇيەۋىنىڭ سوزىنشە، ولار ءتىپتى بىرگە شەتەلگە ساياحات جاساۋدى دا جوسپارلاعان.
«مەن جۇمىستا ەدىم. سول كۇنى تۇندە سويلەسكەندە ءبارى جاقسى بولعان. تاشكەنتكە قالاي باراتىنىمىزدى، قايدا قىدىراتىنىمىزدى تالقىلاعانبىز. ال ەرتەسىنە تانىستارىمىز ماعان ايەلىڭ قۇدىققا ءتۇسىپ، قايتىس بولدى دەپ حابارلاستى. وندا دا وزىنە قول جۇمساعان دەيدى. ول مۇمكىن ەمەس. قۇدىقتىڭ ىشىنە تۇسكەن قىز ءبىر قولىنىڭ جوعارى، ەكىنشى قولىنىڭ تومەن تۇرعانىن ايتتى. ەگەر ءوزى قۇلاسا ەكى قولى دا جوعارىدا بولماي ما؟ قۇلاپ بارا جاتقان كەزدە جانتالاسىپ اينالاسىن ۇستاۋ كەرەك قوي. تىرناعىنىڭ اراسىندا ونداي بەلگىلەر بولماعان. ۇستىندە كۇرتەسى بولعانىمەن اياعىندا اياقكيىمى جوق. ال ىشىندەگى كيىمى جىرتىلىپ كەتكەن. ءبىز ونى قۇدىق ىشىنە ادەيى بىرەۋ لاقتىرىپ جىبەرگەن دەپ ويلايمىز. سەبەبى ايەلىم ول جەردى بىلمەيدى. ومىرىندە ول جەرگە بارىپ كورمەگەن»،—دەيدى مارقۇمنىڭ كۇيەۋى.
ال سۆەتلانا چەرنىحتىڭ ەنەسى كەلىنىن بىرەۋ قاساقانا ءولتىرۋى مۇمكىن دەپ سانايدى.
«مەن ءىستىڭ ءمان جايىن بىلۋگە پوليتسياعا بارعاندا ءبىر-بىرىنە سۋيتسيد بويىنشا تۋىستارى كەلدى دەدى. الايدا قازىرگە دەيىن ەشكىمنەن سۇراق-جاۋاپ المادى، ەكسپەرتيزا جۇرگىزىپ جاتىر ما، ايتپادى. ال كۋاگەردى 1 كۇننەن سوڭ شىعارىپ جىبەرگەن. سول كىسى كەلىنىمدى سوندا اپارعان. جاعدايدى ەستي سالا قۇدىققا بارعان كەزدە، الگى بالا سوندا ءجۇردى. ماس. مەنىڭ كەلىنىم ءولىپ جاتسا، سوندا ەرتىپ اپارعان ادام ءماز بولىپ تۇردى. مۇندا كۇمان بار. ول جىگىت كەلىنىمدى "ولگىم كەلەدى" دەپ سەكىرىپ كەتتى" دەپ ايتتى بارىنە. بىراق كىشكەنتاي عانا قۇبىرعا قالاي سىيدى. قالاي سەكىرەدى وندا؟ بىردەن سەكىرىپ كەتۋى مۇمكىن ەمەس. سەكىرسە دە، نەگە قاسىنداعى جىگىت ۇستاپ قالۋعا تىرىسپادى. ءبىرىنشى بارعان اناسى ىشىنەن قۇتقارىڭدار دەگەن ءسوزدى ەستىپتى»،— دەيدى ول.
ايتا كەتەيىك، مارقۇمنىڭ ارتىندا 3 بالا قالدى. ونىڭ ۇلكەنى 9-دا بولسا، كىشىسى نەبارى 4 جاستا.
