ايدا بالاەۆا دۇنيەجۇزىلىك تەاتر كۇنىمەن قۇتتىقتادى

"بۇگىن بۇكىل الەم تەاتر كۇنىن اتاپ وتۋدە. ءسوز جوق، وسىناۋ ادامزات رۋحانياتىنىڭ بەكزات ونەرى - قاسيەتتى ساحنا قۇدىرەتىن تۇسىنەتىن ءاربىر جان ءۇشىن ەرەكشە ءمان مەن ماڭىزعا يە. ەندەشە، بارشاڭىزدى وسى ءبىر اتاۋلى كۇنمەن شىن جۇرەكتەن قۇتتىقتايمىن! كەزىندە مۇحتار اۋەزوۆتىڭ: “تەاتر — سىمباتتى ونەردىڭ ىشىندەگى ەڭ زورى”، - دەگەن ايگىلى ءسوزى - وسى كۇنى سانى جىل ساناپ كوبەيە تۇسكەن تەاترال-قاۋىمنىڭ رۋحاني تالعامىنا بەرىلگەن بيىك باعا. بۇل تۋرالى تەاتر ونەرىنىڭ ەڭ ۇلكەن قامقورشىسى رەتىندە مەملەكەت باسشىسىنىڭ دا نازار بولەك، قولداۋى ناقتى. اتاپ ايتساق، بۇگىندە ەلىمىزدە 67 تەاتر جەمىستى ەڭبەك ەتىپ كەلسە، ونىڭ 22-ءسى تاۋەلسىزدىك جىلدارىندا 22 اشىلعان. وسى ۋاقىت ىشىندە 10 جاڭا عيمارات سالىندى. ءۇش رەسپۋبليكالىق تەاتر «حالىقتىق» مارتەبەسىن ابىرويمەن ارقالاپ ءجۇر، وڭىرلىك تەاترلار دا دامىپ كەلەدى، ونىڭ بەسەۋىنە «اكادەميالىق» مارتەبەسى بەرىلدى. بۇل سالادا 20 مىڭعا جۋىق تەاتر مايتالمانى ەڭبەك ەتسە، ونىڭ 19-ى حالىق ءارتىسى اتاعىن العان، ال 1 مىڭنان استامى «قۇرمەت»، «پاراسات» وردەندەرىنىڭ جانە قازاقستاننىڭ ەڭبەك سىڭىرگەن ونەر قايراتكەرلەرى اتاعىنىڭ يەگەرلەرى" دەدى ول.

سونداي-اق، ول مادەنيەتىمىزدىڭ ورلەۋىنپ ۇلەس قوسىپ جۇرگەن بارشا ارتىستەرگە العىسىن ايتتى:

"شىن مانىندە، بۇل ءبىزدىڭ ۇلتىمىزدىڭ ەڭ قۇندى دا قازىنالى ادامي الەۋەتى. سوندىقتان دا مەن مادەنيەتىمىزدى ساقتاۋعا جانە دامىتۋعا ۇلەس قوسىپ جۇرگەن بارشا ونەر يەلەرىنە العىس ايتامىن. سىزدەردىڭ كۇندەلىكتى ەڭبەكتەرىڭىزدىڭ جەمىسىن قوعام سەزىنىپ، مەملەكەت قاشان دا قولدايدى. جاڭا اتاپ وتكەنىمدەي، سوڭعى جىلدارى حالىقتىڭ تەاترعا دەگەن قىزىعۋشىلىعى ارتىپ كەلە جاتىر. رەپەرتۋارلىق ساياساتتىڭ وڭ ديناميكاسى مەن دامۋى بايقالادى. تەاتر رەپەرتۋارىندا بۇگىندە 2,5 مىڭ سپەكتاكل بار. وتكەن جىلدىڭ وزىندە 12 مىڭنان استام سپەكتاكل ساحنالانعان، ونى 2,5 ميلليوننان استام كورەرمەن تاماشالادى. سونداي-اق 66 مىڭى شەتەلدە گاسترولدىك ساپارلاردا قويىلدى. مىنە، وسىنىڭ بارلىعىنىڭ تۇبىندە سىزدەردىڭ - تەاتر مايتالماندارىنىڭ ەڭبەگى جاتىر. ءسىزدىڭ ونەرگە ادالدىقتارىڭىزعا، شەبەرلىك پەن تالانتتارىڭىزعا مىڭ العىس! ونەرلەرىڭىز كوپشىلىكتىڭ كوڭىلىنەن شىعىپ، جاقسىلىققا جارشى بولا بەرگەيسىزدەر!

دۇنيەجۇزىلىك تەاتر كۇنى قۇتتى بولسىن!" دەپ جازدى ول ءوزىنىڭ Facebook پاراقشاسىندا.