Crocus City Hall كونتسەرت زالىنا جاسالعان شابۋىل تۋرالى ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياك تۇسىنىكتەمە بەردى. ونىڭ ايتۋىنشا، كيەۆتىڭ بۇل شابۋىلعا ەش قاتىسى جوق. ال رەسەي قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ لاڭكەستەردىڭ كيەۆتەن شىققانى انىقتالسا، كۇشكە كۇشپەن جاۋاپ بەرۋ كەرەگىن ايتقان.
«رەسەيدىڭ ماسكەۋ وبلىسىنداعى كروكۋس-سيتيدە بەلگىسىز تۇلعالاردىڭ ارالاسۋىمەن لاڭكەستىك ارەكەتتەر بولدى. بۇل وقيعاعا ۋكراينانىڭ مۇلدەم قاتىسى جوعىن اتاپ وتەيىن»، - دەگەن ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياك.
پودولياك ۋكراينانىڭ ەشقاشان لاڭكەستىك سوعىس ادىستەرىن قولدانبايتىنىن اتاپ ءوتتى. سونداي-اق ول ناۋرىز ايىنىڭ باسىندا باتىس ەلدەرىنىڭ ەلشىلىكتەرى الداعى ەكسترەميستىك ارەكەتتەر تۋرالى ەسكەرتكەنىن ەسكە سالدى.
بۇدان الدىن ۋكراينا جاعىندا سوعىسىپ جاتقان رەسەيدىڭ ەرىكتىلەر كورپۋسىنىڭ وكىلدەرى ماسكەۋدەگى وقيعا جايىندا وعان وزدەرنىڭ قاتىسى جوعىن ايىتپ مالىمدەمە جاساعان بولاتىن. رەسەيدە بۇل توپ «تەرروريستىك ۇيىم» دەپ تانىلىپ، تىيىم سالىنعان. ولار بەلگورود وبلىسىندا سوڭعى اپتالاردا جيىلەپ كەتكەن تۇراقتى رەيدتەر ءۇشىن جاۋاپكەرشىلىكتى ءوز موينىنا الدى.
سوڭعى وقيعاعا قاتىستى «بۇل ءبىز ەمەس»، - دەگەن رەسەي ەرىكتىلەرىنىڭ وكىلى Novaya-Europa-عا.
ال رەسەي قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ ءوزىنىڭ Telegram-ارناسىندا لاڭكەستەر تەك قانا تەررورمەن بەرەتىن جاۋاپتى تۇسىنەتىنىن جانە كۇشكە كۇشپەن قارسى تۇرۋ كەرەكتىگىن ايتقان.
«ەگەر بۇل كيەۆ رەجيمىنىڭ لاڭكەستەرى ەكەنى انىقتالسا، ولارمەن جانە ولاردىڭ يدەولوگيالىق دەم بەرۋشىلەرىمەن باسقاشا ارەكەت ەتۋ مۇمكىن ەمەس. ولاردىڭ بارلىعىن تەرروريست رەتىندە تاۋىپ، اياۋسىز جويۋ كەرەك. سونىڭ ىشىندە وسىنداي قياناتقا بارعان مەملەكەتتىڭ شەنەۋنىكتەرى دە بار»، – دەپ جازدى ول.
رەسەي پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆتىڭ ايتۋىنشا، پۋتينگە اتىس باستالعاننان كەيىن العاشقى مينۋتتاردا-اق حابارلانعان. پەسكوۆ ءپۋتيننىڭ نە بولىپ جاتقانىن جانە قابىلدانىپ جاتقان شارالار تۋرالى اقپاراتتى بارلىق ءتيىستى قىزمەتتەر ارقىلى ۇنەمى الىپ وتىرعانىن ايتتى.
22 ناۋرىز كۇنى كەشكە ماسكەۋ تۇبىندەگى Crocus City Hall كونتسەرت زالىندا اتىس بولعان. بەيرەسمي مالىمەتتەرگە قاراعاندا اتىستان كەم دەگەندە 40 ادام قازا تاۋىپ، جۇزدەگەن ادام جارالانۋى مۇمكىن.
