Crocus City Hall konert zalyna jasalǵan shabýyl týraly Ýkraına prezıdenti keńsesi basshysynyń keńesshisi Mıhaıl Podolıak túsinikteme berdi. Onyń aıtýynsha, Kıevtiń bul shabýylǵa esh qatysy joq. Al Reseı qaýipsizdik keńesi tóraǵasynyń orynbasary Dmıtrıı Medvedev lańkesterdiń Kıevten shyqqany anyqtalsa, kúshke kúshpen jaýap berý keregin aıtqan.
«Reseıdiń Máskeý oblysyndaǵy Krokýs-Sıtıde belgisiz tulǵalardyń aralasýymen lańkestik áreketter boldy. Bul oqıǵaǵa Ýkraınanyń múldem qatysy joǵyn atap óteıin», - degen Ýkraına prezıdenti keńsesi basshysynyń keńesshisi Mıhaıl Podolıak.
Podolıak Ýkraınanyń eshqashan lańkestik soǵys ádisterin qoldanbaıtynyn atap ótti. Sondaı-aq ol naýryz aıynyń basynda Batys elderiniń elshilikteri aldaǵy ekstremıstik áreketter týraly eskertkenin eske saldy.
Budan aldyn Ýkraına jaǵynda soǵysyp jatqan Reseıdiń eriktiler korpýsynyń ókilderi Máskeýdegi oqıǵa jaıynda oǵan ózderniń qatysy joǵyn aıytp málimdeme jasaǵan bolatyn. Reseıde bul top «terrorıstik uıym» dep tanylyp, tyıym salynǵan. Olar Belgorod oblysynda sońǵy aptalarda jıilep ketken turaqty reıdter úshin jaýapkershilikti óz moınyna aldy.
Sońǵy oqıǵaǵa qatysty «Bul biz emes», - degen Reseı eriktileriniń ókili Novaya-Europa-ǵa.
Al Reseı qaýipsizdik keńesi tóraǵasynyń orynbasary Dmıtrıı Medvedev óziniń Telegram-arnasynda lańkester tek qana terrormen beretin jaýapty túsinetinin jáne kúshke kúshpen qarsy turý kerektigin aıtqan.
«Eger bul Kıev rejıminiń lańkesteri ekeni anyqtalsa, olarmen jáne olardyń ıdeologııalyq dem berýshilerimen basqasha áreket etý múmkin emes. Olardyń barlyǵyn terrorıst retinde taýyp, aıaýsyz joıý kerek. Sonyń ishinde osyndaı qııanatqa barǵan memlekettiń sheneýnikteri de bar», – dep jazdy ol.
Reseı prezıdenti Vladımır Pýtınniń baspasóz hatshysy Dmıtrıı Peskovtyń aıtýynsha, Pýtınge atys bastalǵannan keıin alǵashqy mınýttarda-aq habarlanǵan. Peskov Pýtınniń ne bolyp jatqanyn jáne qabyldanyp jatqan sharalar týraly aqparatty barlyq tıisti qyzmetter arqyly únemi alyp otyrǵanyn aıtty.
22 naýryz kúni keshke Máskeý túbindegi Crocus City Hall konert zalynda atys bolǵan. Beıresmı málimetterge qaraǵanda atystan kem degende 40 adam qaza taýyp, júzdegen adam jaralanýy múmkin.
