Mäskeudegı şabuyl anyqtalmai jatyp Resei men Ukraina bet jyrtysty

Crocus City Hall konsert zalyna jasalǧan şabuyl turaly Ukraina prezidentı keŋsesı basşysynyŋ keŋesşısı Mihail Podoliak tüsınıkteme berdı. Onyŋ aituynşa, Kievtıŋ būl şabuylǧa eş qatysy joq. Al Resei qauıpsızdık keŋesı töraǧasynyŋ orynbasary Dmitrii Medvedev laŋkesterdıŋ Kievten şyqqany anyqtalsa, küşke küşpen jauap beru keregın aitqan. «Reseidıŋ Mäskeu oblysyndaǧy Krokus-Sitide belgısız tūlǧalardyŋ aralasuymen laŋkestık äreketter boldy. Būl oqiǧaǧa Ukrainanyŋ müldem qatysy joǧyn atap öteiın», - degen Ukraina prezidentı keŋsesı basşysynyŋ keŋesşısı Mihail Podoliak. Podoliak Ukrainanyŋ eşqaşan laŋkestık soǧys ädısterın qoldanbaitynyn atap öttı. Sondai-aq ol nauryz aiynyŋ basynda Batys elderınıŋ elşılıkterı aldaǧy ekstremistık äreketter turaly eskertkenın eske saldy. Būdan aldyn Ukraina jaǧynda soǧysyp jatqan Reseidıŋ erıktıler korpusynyŋ ökılderı Mäskeudegı oqiǧa jaiynda oǧan özdernıŋ qatysy joǧyn aiytp mälımdeme jasaǧan bolatyn. Reseide būl top «terroristık ūiym» dep tanylyp, tyiym salynǧan. Olar Belgorod oblysynda soŋǧy aptalarda jiılep ketken tūraqty reidter üşın jauapkerşılıktı öz moinyna aldy. Soŋǧy oqiǧaǧa qatysty «Būl bız emes», - degen Resei erıktılerınıŋ ökılı Novaya-Europa-ǧa. Al Resei qauıpsızdık keŋesı töraǧasynyŋ orynbasary Dmitrii Medvedev özınıŋ Telegram-arnasynda laŋkester tek qana terrormen beretın jauapty tüsınetının jäne küşke küşpen qarsy tūru kerektıgın aitqan. «Eger būl Kiev rejimınıŋ laŋkesterı ekenı anyqtalsa, olarmen jäne olardyŋ ideologiialyq dem beruşılerımen basqaşa äreket etu mümkın emes. Olardyŋ barlyǧyn terrorist retınde tauyp, aiausyz joiu kerek. Sonyŋ ışınde osyndai qiianatqa barǧan memlekettıŋ şeneunıkterı de bar», – dep jazdy ol. Resei prezidentı Vladimir Putinnıŋ baspasöz hatşysy Dmitrii Peskovtyŋ aituynşa, Putinge atys bastalǧannan keiın alǧaşqy minuttarda-aq habarlanǧan. Peskov Putinnıŋ ne bolyp jatqanyn jäne qabyldanyp jatqan şaralar turaly aqparatty barlyq tiıstı qyzmetter arqyly ünemı alyp otyrǧanyn aitty. 22 nauryz künı keşke Mäskeu tübındegı Crocus City Hall konsert zalynda atys bolǧan. Beiresmi mälımetterge qaraǧanda atystan kem degende 40 adam qaza tauyp, jüzdegen adam jaralanuy mümkın.