Shymkent qalasynyń ákimi Ǵabıt Syzdyqbekov memleket basshysyna hat joldaǵan 12 jastaǵy Sofııa esimdi búldirshinniń otbasyna jáne alty balany órtten aman alyp qalǵan Marına Gafarovaǵa Naýryz merekesiniń qarsańynda páter syılady, dep habarlaıdy “Adyrna” ulttyq portaly. Bul týraly ol óziniń áleýmettik jelidegi paraqshasynda jazdy.
Ákesimen birge jaldamaly páterde turatyn 12 jasar Sofııa Úrkimbaeva “Tilekter shyrshasy” akııasy aıasynda prezıdent Qasym-Jomart Toqaevtyń atyna hat jazǵan bolatyn.
Al Marına Gafarova ótken jyldyń jeltoqsan aıynda kórshi úıdegi órtti baıqap, kámeletke tolmaǵan alty balany aman alyp qaldy.
Shymkent ákimi Ǵabıt Syzdyqbekov jańa páter ıeleriniń qýanyshynda shek joq ekenin jazdy:
“Naýryz merekesi qarsańynda Memleket basshysyna hat jazǵan 12 jasar Sofııa Úrkimbaevaǵa jáne Marına Gafarovaǵa páter kiltterin tabys ettim. Kiltterdi tapsyrý rásiminde jańa qonystanýshylar prezıdentke rızashylyqtaryn bildirdi” dep jazdy ol.
Osyǵan deıin qala ákimi kópbalaly ananyń erligine alǵysyn bildirip, tórt bólmeli páterdiń kiltin tabystaýǵa ýáde bergen bolatyn.
Kilt tapsyrý rásiminde Sofııanyń ákesi Rústenbek Úrkimbaev pen Marına Gafarova Memleket basshysyna erekshe alǵysyn bildirdi. Sofııa da óziniń qýanyshyn jasyrmaı, óleń oqyp, ony el Prezıdentine joldady.
