بۇگىن كۇن مەن ءتۇن تەڭەلىپ، استرونوميالىق جاڭا جىل باستالدى، دەپ حابارلايدى "ادىرنا".
ءىس بارىسىندا بۇل ناۋرىزدىڭ باستالۋى بولىپ تابىلادى. كۇن كۇنتىزبەسىن قولداناتىن يران سياقتى ەلدەردە استرونوميالىق ەسەپ بويىنشا ناۋرىز مەرەكەسىن تويلاۋدى بۇگىننەن باستاپ كەتتى.
كۇن مەن ءتۇن كوكتەمدە جانە كۇزدە تەڭەلەدى. اسپان دەنەلەرىنىڭ ءجۇرىسى بويىنشا، سولتۇستىك جارتى شاردا كوكتەمگى كۇن مەن ءتۇننىڭ تەڭەلۋى بيىل 20 ناۋرىزعا سايكەس كەلدى. كۇن وڭتۇستىك جارتى شاردان سولتۇستىك جارتى شارعا اۋىسقاندا كوكتەمگى كۇن مەن ءتۇن تەڭەلەدى.
كۇن مەن ءتۇننىڭ تەڭەلۋ مەرزىمى ءار جىلى وزگەرىپ تۇرادى. ادەتتە، ءار جىلدارى 19 ناۋرىز بەن 22 ناۋرىز اراسىندا اۋىسىپ كەلەدى.
بيىلعى كۇن مەن ءتۇننىڭ تەڭەلۋ ۋاقىتى 20 ناۋرىز كۇنى استانا ۋاقىتىمەن تاڭعى ساعات 8-دەن 6 مينۋت ۋاقىتقا سايكەس كەلدى. ياعني، وسى ساتتە كۇن وڭتۇستىك جارتى شاردان سولتۇستىك جارتى شارعا اۋىستى.
قازاقستان تاۋەلسىزدىك العان كەزدە 22 ناۋرىزدى ناۋرىز مەرەكەسى، ۇلىستىڭ ۇلى كۇنى رەتىندە اتاپ ءوتتى. كەيىننەن بۇل مەرەكەنى ناۋرىزدىڭ 21-ىنەن باستاپ تويلايتىن بولدى.
