پاۆلودار وبلىسىندا اۋدان اكىمىنىڭ ۇلى وقۋشى قىزدى سوققىعا جىققان. اقپاراتتى ءبىلىم مينيسترلىگى راستادى، - دەپ حابارلايدى "ادىرنا" ۇلتتىق پورتالى.
ورتالىق كوممۋنيكاتسيالار قىزمەتىندە وتكەن بريفينگتە جۋرناليست ءبىلىم ۆيتسە-ءمينيسترى ەدىل وسپاننان وسى جاعدايعا قاتىستى ءمان-جايدى سۇرادى:
«پاۆلودار وبلىسىندا اۋدان اكىمىنىڭ ۇلى مەكتەپ قابىرعاسىندا قىزدى ۇرىپ-سوعىپ، مۇرنىن سىندىرعانى تۋرالى اقپارات جەلىدە پايدا بولدى. قىزدىڭ اناسى دۇرىس تاربيە بەرمەگەنى ءۇشىن اكىمشىلىك جاۋاپكەرشىلىككە تارتىلدى. وسى جاعدايعا قاتىستى پىكىرىڭىزدى تىڭداپ، بىلگىم كەلەدى. نەلىكتەن قىزدى ۇرعان ۇل مەن ونىڭ اتا-اناسى جاۋاپقا تارتىلمادى» دەگەن سۇراق قويىلدى.
ءبىلىم ۆيتسە-ءمينيسترى بۇل دەرەكتى راستادى.
«ءيا، شىنىندا دا مۇنداي فاكت بولعان. مەن بارشاعا ايتقىم كەلەتىنى، ءبىز الەۋمەتتىك جەلىلەردە پايدا بولعان ءاربىر جاعدايدى مۇقيات تەكسەرىپ، ءتيىستى مەملەكەتتىك ورگاندارعا حابارلايمىز. وسى فاكتىگە سۇيەنە وتىرىپ، مەن قازىر تەرگەۋ ءجۇرىپ جاتقانىن، تيىسىنشە شارا قولدانىلاتىنىن حابارلايمىن. تۋىستىق بايلانىسقا قاتىستى ايتار بولسام، مەنىڭ بىلۋىمشە تۋىستىق بايلانىستىڭ بار ەكەنى راستالدى»، - دەدى وسپان.
اقپاراتقا بالالار قۇقىعىن قورعاۋ كوميتەتى توراعاسىنىڭ ورىنباسارى يۋليا وۆەچكينا دا تۇسىنىكتەمە بەردى. ونىڭ ايتۋىنشا، جانجال اعىمداعى جىلدىڭ قاڭتار ايىندا پاۆلودار وبلىسىنداعى مەكتەپتەردىڭ بىرىندە بولعان.
"شىنىمەن دە، بۇل فاكت ورىن الدى. ول اعىمداعى جىلدىڭ قاڭتار ايىندا تىركەلگەن. بىزگە بەلگىلى بولعانداي، بۇگىندە ءىس كامەلەتكە تولماعاندار ىستەرى جونىندەگى سوتتا قارالىپ جاتىر، بالانىڭ اتا-اناسىن اكىمشىلىك جاۋاپكەرشىلىككە تارتۋ بويىنشا جينالىس ءوتىپ ۇلگەردى", - دەدى ول.
ايتا كەتەيىك، بۇعان دەيىن الەۋمەتتىك جەلىدە زارداپ شەككەن قىزدىڭ اناسىنىڭ ۇندەۋى شىققان بولاتىن. پوليتسەيلەر جاعدايدى انىقتاپ، پاۆلوداردا 7-سىنىپ وقۋشىسى مەن 6-سىنىپ وقۋشىسى اراسىندا جانجال بولعانىن حابارلادى. وقيعا سالدارىنان قىز اۋرۋحاناعا جاتقىزىلدى. پوليتسەيلەر بالانىڭ ارەكەتىن دەنساۋلىققا قاساقانا جەڭىل زيان كەلتىرۋ دەپ باعالاعان. ءىس ماتەريالدارى سوتقا جولداندى.
سونداي-اق، قالالىق ءماسليحات دەپۋتاتى گۇلجاينا ءدارىموۆا اتالمىش كيكىلجىڭگە قاتىستى كىشكەنتاي قىزدى «بالانى سونداي ەموتسياعا جەتكىزگەن ءوزى» دەپ ايىپتاعان بولاتىن.
