ءماجىلىس دەپۋتاتى ەلنۇر بەيسەنباەۆ دەنساۋلىق ساقتاۋ ءمينيسترى اقمارال النازاروۆاعا بىرقاتار سالالىق ماسەلەلەردى اتاپ، دەپۋتاتتىق ساۋال جولدادى، دەپ حابارلايدى "ادىرنا" ۇلتتىق پورتالى.
دەپۋتات قازىرگى تاڭداعى قولدانىستاعى مەديتسينالىق ساقتاندىرۋدىڭ مودەلى بىرنەشە نورمالارعا سايكەس كەلمەيتىنىن ايتتى:
"مەديتسينالىق ساقتاندىرۋدىڭ قولدانىستاعى مودەلى ەكونوميكانىڭ بارلىق قاعيداتتارىنا قايشى كەلەدى، ءوز دەنساۋلىعى ءۇشىن دەربەس جاۋاپكەرشىلىكتى جانە ەمدەلۋگە دەربەس جيناقتاردى قامتىمايدى. ادام ءوز دەنساۋلىعىنا قالاي قارايتىنىنا قاراماستان تولەۋگە مىندەتتى بولىپ شىعادى. ياعني، جامان ادەتتەرى جوق، سپورتپەن شۇعىلداناتىن جانە اۋدارىمدارىن ەمدەۋگە جۇمسامايتىندار دەنساۋلىعىنا ءمان بەرمەيتىندەر، تەمەكى شەگەتىندەر، ىشەتىندەر جانە ودان ۇنەمى ءدارى-دارمەكتەر مەن دارىگەرلەرگە اقشا جۇمسايتىندارمەن بىردەي تولەۋى كەرەك" دەدى بەيسەنباەۆ.
سونداي-اق، ول ەرەكشە ساناتتاعى ادامدار توبىنا قاتىستى ىنتىماقتى قاعيدات بويىنشا جۇمىس ىستەلۋى كەرەكتىگىن قوستى.
"قارتتارعا، مۇگەدەكتەرگە جانە توتەنشە جاعدايلارعا قاتىستى ىنتىماقتى قاعيدات جۇمىس ىستەۋى كەرەك ەكەنى تۇسىنىكتى. بىراق تولىققاندى ادامدار دەنساۋلىعىنا جاۋاپ بەرۋى كەرەك. ال ءاربىر جارنا تولەۋشىنىڭ ءوز جارنالارىن ءوز بەتىنشە بيلىك ەتۋگە قۇقىعى بولۋعا ءتيىس. ايتپەسە، ولاردىڭ ەديتسينالىق كومەككە جۇگىنبەستەن اي سايىن قورعا تولەيتىن اقشاسى ءۇشىنشى تۇلعالاردىڭ مەديتسينالىق قىزمەتتەرىن تولەۋگە كەتەدى، سونىمەن قاتار قور ونى ءوز قالاۋى بويىنشا پايدالانادى. اقيقاتىندا، بۇل ساقتاندىرۋ ەمەس، سالىقتىڭ قوسىمشا ءتۇرى" دەلىندى دەپۋتات ساۋالىندا.
ەلنۇر بەيسەنباەۆ ساقتاندىرۋ سوماسىن كوبەيتپەس بۇرىن اتالمىش ماسەلەلەردى شەشىپ الۋ قاجەتتىگىن ايتتى.
"بىراق سالىقتاردى اشىق تۇردە پايدالانۋ كەرەك، ال ءمامس قورىنىڭ جۇمىسى – بۇل ءبىر ۇلكەن جۇمباق جانە ءبىر ۇلكەن ءتۇبى جوق «قارا تەسىك». مۇنداي جاعدايلاردا الدىڭعى جۇزدەگەن ميللياردتاردىڭ قالاي جانە نەگە جۇمسالعانىن تۇسىنبەي تۇرىپ، قورعا تولەمدەردى بەس ەسە ارتتىرۋ قوعام ءۇشىن تىم قىمبات جانە بيزنەسكە شامادان تىس جۇكتەمە بولىپ تابىلادى" دەدى ول.
ءمامس جۇيەسىنە قاتىستى كوزگە كورىنەتىن ماسەلەلەردى اتاي وتىرىپ، ول مينيستردەن:
ء"مامس تولەمدەرىن ارتتىرۋدان باس تارتۋ; مەديتسينالىق ساقتاندىرۋ جۇيەسىن مونوپولياسىزداندىرۋ جانە وسى سالادا نارىقتىق جانە باسەكەلەستىك تەتىكتەردى ەنگىزۋ; ازاماتتاردىڭ ساقتاندىرۋ ۇيىمدارىنداعى شوتتارىن اشىقتىق پەن ەرىكتىلىك نەگىزىندە دەربەستەندىرۋ; ءاربىر ناقتى ازاماتتىڭ دەنساۋلىق جاعدايى مەن ءومىر سالتىنا بايلانىستى ساقتاندىرۋ سىيلىقاقىلارىن تولەۋ سومالارىن ايقىنداۋ ادىستەمەسىن ازىرلەۋ; ءمامس ساقتاندىرۋ جانە ىنتىماقتاستىق ءبولىمىن ءبولۋ" بويىنشا شەشىم قاراستىرۋدى سۇرادى.
