اتىراۋ وبلىسىندا ورتكە قارسى قورعاۋدى 14 ءورت ءسوندىرۋ ءبولىمى جۇزەگە اسىرادى. بۇل تۋرالى وبلىستىق توتەنشە جاعدايلار دەپارتامەنتى باستىعىنىڭ ورىنباسارى، پودپولكوۆنيك رۋسلان شاريەۆ ايتتى، دەپ حابارلايدى «ادىرنا» ءتىلشىسى.
«اتالعان ءورت ءسوندىرۋ بولىمدەرىنىڭ 79% 1958-1993 جىلدار ارالىعىندا سالىنعان عيماراتتار. كاسىبي اۆاريالىق-قۇتقارۋ جانە كينولوگيالىق قىزمەتتەردىڭ قامتاماسىز ەتۋ نورماسى قازاقستان رەسپۋبليكاسى توتەنشە جاعدايلار مينيسترلىگىنىڭ 2021 جىلعى 06 قىركۇيەكتەگى №429 بۇيرىعىمەن بەكىتىلگەن. اتالعان نورماعا سايكەس دەپارتامەنتتىڭ قۇرىلىمدىق بولىمشەلەرىندە 357 بىرلىك (121 بىرلىك نەگىزگى، 59 بىرلىك ارنايى جانە 175 بىرلىك كومەكشى) بولۋى ءتيىس. الايدا جوعارىدا كورسەتىلگەندەي ءورت ءسوندىرۋ بولىمدەرىنىڭ عيماراتتارى ەسكى بولۋىنا بايلانىستى نورماعا سايكەس تەحنيكانى ءورت ءسوندىرۋ بولىمدەرىندە ورنالاستىرۋعا مۇمكىندىك جوق. وبلىس اۋماعىنداعى ءورت ءسوندىرۋ اۆتوكولىكتەرىنە ارنالعان ورىندار بويىنشا ەسەپتەسەك، 100% قامتىلعان. قازىرگى ۋاقىتتا قىزمەت تەڭگەرىمىندە 152 بىرلىك اۆتوكولىك قۇرالى بار. ونىڭ ىشىندە 65 بىرلىك نەگىزگى، 20 بىرلىك ارنايى، 67 بىرلىك كومەكشى»،-دەدى ول.
رۋسلان شاريەۆ بۇل ءوڭىر مۇنايلى ولكە بولىپ تابىلاتىندىقتان، ايماقتا رەزەرۆۋار پاركتەرى مەن جارىلۋ قاۋپى بار نىساندار كوپ كەزدەسەتىنىن اتاپ ءوتتى.
«نىساندارداعى ورتتەردى ءسوندىرۋدى جەڭىلدەتۋ جانە ءورت سوندىرۋشىلەردىڭ جاراقاتتانۋىنىڭ الدىن الۋ ماقساتىندا «Thermite RS3» ءورت ءسوندىرۋشى روبوتىن جانە بيىك عيماراتتارداعى ورتتەردى سوندىرۋگە ارنالعان ءورت ءسوندىرۋ دروندارىن 2024 جىلعى جەرگىلىكتى ساتىپ الۋدى ۇسىنىپ وتىرمىز. اعىمدىعى جىلى ءيىندى كوتەرگىش جانە ءورت ءسوندىرۋ درون ساتىپ الۋ ءۇشىن جەرگىلىكتى بيۋدجەتكە ۇسىنىس بەرىلدى. ناتيجەسى ماسليحات وتىرىسىندا بەلگىلى بولادى. توتەنشە جاعداي دەپارتامەنتىن جابدىقتاۋ قر ءىىم 2015 جىلعى 27 ماۋسىمداعى №567 بۇيرىعىنا سايكەس ىسكە اسىرىلادى»،-دەپ تولىقتىردى تجد ورىنباسارى.
ايتا كەتەيىك، بيىل دەپارتامەنتتىڭ تەحنيكالىق بازاسى ءۇشىن بيۋدجەتتەن 462,2 ملن تەڭگە بولىنگەن.
