Atyraý oblysynda órtke qarsy qorǵaýdy 14 órt sóndirý bólimi júzege asyrady. Bul týraly oblystyq tótenshe jaǵdaılar departamenti bastyǵynyń orynbasary, podpolkovnık Rýslan Sharıev aıtty, dep habarlaıdy «Adyrna» tilshisi.
«Atalǵan órt sóndirý bólimderiniń 79% 1958-1993 jyldar aralyǵynda salynǵan ǵımarattar. Kásibı avarııalyq-qutqarý jáne kınologııalyq qyzmetterdiń qamtamasyz etý normasy Qazaqstan Respýblıkasy Tótenshe jaǵdaılar mınıstrliginiń 2021 jylǵy 06 qyrkúıektegi №429 buıryǵymen bekitilgen. Atalǵan normaǵa sáıkes Departamenttiń qurylymdyq bólimshelerinde 357 birlik (121 birlik negizgi, 59 birlik arnaıy jáne 175 birlik kómekshi) bolýy tıis. Alaıda joǵaryda kórsetilgendeı órt sóndirý bólimderiniń ǵımarattary eski bolýyna baılanysty normaǵa sáıkes tehnıkany órt sóndirý bólimderinde ornalastyrýǵa múmkindik joq. Oblys aýmaǵyndaǵy órt sóndirý avtokólikterine arnalǵan oryndar boıynsha eseptesek, 100% qamtylǵan. Qazirgi ýaqytta Qyzmet teńgeriminde 152 birlik avtokólik quraly bar. Onyń ishinde 65 birlik negizgi, 20 birlik arnaıy, 67 birlik kómekshi»,-dedi ol.
Rýslan Sharıev bul óńir munaıly ólke bolyp tabylatyndyqtan, aımaqta rezervýar parkteri men jarylý qaýpi bar nysandar kóp kezdesetinin atap ótti.
«Nysandardaǵy órtterdi sóndirýdi jeńildetý jáne órt sóndirýshilerdiń jaraqattanýynyń aldyn alý maqsatynda «Thermite RS3» órt sóndirýshi robotyn jáne bıik ǵımarattardaǵy órtterdi sóndirýge arnalǵan órt sóndirý drondaryn 2024 jylǵy jergilikti satyp alýdy usynyp otyrmyz. Aǵymdyǵy jyly ıindi kótergish jáne órt sóndirý dron satyp alý úshin jergilikti bıýdjetke usynys berildi. Nátıjesi maslıhat otyrysynda belgili bolady. Tótenshe jaǵdaı departamentin jabdyqtaý QR IIM 2015 jylǵy 27 maýsymdaǵy №567 buıryǵyna sáıkes iske asyrylady»,-dep tolyqtyrdy TJD orynbasary.
Aıta keteıik, bıyl departamenttiń tehnıkalyq bazasy úshin bıýdjetten 462,2 mln teńge bólingen.
