ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جاساندى ينتەللەكت عزي عالىمدارى ChatGPT چات-بوتىنىڭ قازاق تىلىندەگى وتاندىق انالوگىن جاساپ شىعاردى، دەپ حابارلايدى «ادىرنا» ءتىلشىسى.
زەرتتەۋشىلەر مەملەكەتتىك تىلدەگى جاساندى ينتەللەكت جۇيەسىن 5 ايدىڭ ىشىندە ازىرلەدى. ChatGPT چات-بوتىنىڭ قازاقستاندىق ۇلگىسى ۇلكەن كولەمدەگى دەرەكتەردى تالداي الادى، سۇراقتارعا جاۋاپ بەرەدى، ماتىندەر قۇرا الادى، سونىمەن قاتار قازاق ءتىلىنىڭ بارلىق مورفولوگيالىق جانە سينتاكسيستىك ەرەجەلەرىن بىلەدى.
«ءبىز قازاق تىلىندە ءبىرىنشى ءىرى LLM ءتىل ۇلگىسىن جاسادىق. جۇيە نەيروندىق جەلى ارحيتەكتۋراسى نەگىزىندە قازاق تىلىندەگى كەز كەلگەن ءماتىندى تۇسىنۋگە جانە ءوز بىلىمىنە سايكەس جاۋاپ بەرۋگە قابىلەتتى. ءبىزدىڭ ChatGPT ءپروتوتيپىمىز قازاق ءتىلىنىڭ ەرەجەلەرىن تۇسىنەدى، ارىپتەر مەن بۋىندار، سوزدەر مەن سويلەمدەر اراسىنداعى بارلىق تىزبەكتەردى ەستە ساقتايدى، سونىمەن قاتار سينتاكسيستىك جانە گرامماتيكالىق تۇرعىدان دۇرىس ءارى پايدالانۋشىنىڭ سۇرانىسىنا سايكەس كەلەتىن دارەجەدە جاۋاپ بەرە الادى»،—دەپ اتاپ ءوتتى ل.ن.گۋميلەۆ اتىنداعى ەۇۋ «جاساندى ينتەللەكت» عىلىمي-زەرتتەۋ ينستيتۋتىنىڭ ديرەكتورى الىبەك بارلىباەۆ.
عالىمدار جۇيەنىڭ قازاق ادەبي شىعارمالارىن، نورماتيۆتىك قۇجاتتامالار مەن عىلىمي ماتەريالداردى دايىنداۋ بويىنشا تاجىريبەلەر جۇرگىزىپ كوردى. ولار جاساندى ينتەللەكت مودەلىن ءبىلىم بەرۋ ۇردىسىندە قولدانۋدى ۇسىنباق. چات-بوتتىڭ ءبىلىمىن قاجەتتى اقپاراتتى ناقتىلاۋ ءۇشىن پايدالانۋعا بولادى.
بۇگىندە ءىت سالاسىنداعى عالىمدار مەن ماماندار جوبانىڭ تەحنيكالىق جانە سەرۆەرلىك مۇمكىندىكتەرىن نىعايتىپ، ودان ءارى دامىتۋدى جوسپارلاپ وتىر.