الماتى قالاسى ءماسليحاتىنىڭ كەزەكتەن تىس 14-سەسسياسىندا ەكى جاڭا باسقارما قۇرۋ ۇسىنىلدى، دەپ حابارلايدى "ادىرنا" ۇلتتىق پورتالى.
الماتى ءماسليحاتىنىڭ كەزەكتەن تىس 14-سەسسياسىندا ەكى جاڭا باسقارما قۇرۋ ۇسىنىلدى: سەيسميكالىق قاۋىپسىزدىك جانە جۇمىلدىرۋ دايىندىعى باسقارماسى جانە قوعامدىق كەڭىستىكتەر باسقارماسى.
الماتى اكىمى اپپاراتىنىڭ باسشىسى بەيبىت شاحانوۆتىڭ ايتۋىنشا، سەيسميكالىق قاۋىپسىزدىك جانە جۇمىلدىرۋ دايىندىعى باسقارماسىنىڭ باستى مىندەتى - سەيسميكالىق ستاندارتتاردىڭ ساقتالۋىن قامتاماسىز ەتۋ، جەر سىلكىنىسى تاۋەكەلدەرىن باسقارۋ، تۇرعىنداردى تج كەزىندە نەگىزگى داعدىلارعا وقىتۋدى قامتاماسىز ەتۋ، تج كەزىندە پد جانە تجد جۇمىستارىن ۇيلەستىرۋ.
قوعامدىق كەڭىستىكتەر باسقارماسى قوعامدىق كەڭىستىكتەردى دامىتۋدىڭ جالپى قاعيداتتارى مەن ادىستەرىن قامتاماسىز ەتۋگە، باسقارمالار مەن قالا اكىمدىگىنىڭ جۇمىسىن ۇيلەستىرۋگە باعىتتالعان. سونداي-اق، بۇل باسقارۋ قوعامدىق كەڭىستىكتەردى دامىتۋ تۇجىرىمدامالارىن دايىنداۋعا، قالا ءۇشىن ماڭىزدى قوعامدىق كەڭىستىكتەردى جاڭعىرتۋعا جاۋاپتى بولادى.
الماتىدا ءبىر ايداي بۇرىن، 23 قاڭتارعا اۋعان ءتۇنى ەلەۋلى جەر سىلكىنىسى سەزىلگەن بولاتىن. استانا ۋاقىتىمەن 23 قاڭتار كۇنى 00 ساعات 09 مينۋتتا جەر سىلكىنگەن. ەپيتسەنترى مەگاپوليستەن وڭتۇستىك-شىعىسقا قاراي 264 شاقىرىم جەردە، قازاقستەن مەن قىرعىزستان شەكاراسى اۋماعىندا بولدى.
ەنەرگەتيكالىق ساناتى – 15.1. MPV تەربەلىسى – 6.7. تەرەڭدىگى – 65 كم.
جەر سىلكىنىسى الماتىدا 5 بالل دەڭگەيىندە (MSK-64 شكالاسى بويىنشا) سەزىلدى.
سول ءتۇنى الماتى تۇرعىندارى ۇرەيلەنىپ، ۇيىنەن كوشەگە، دالاعا شىقتى. ولار ەلەۋلى جەر سىلكىنىسىنەن كەيىن جاپپاي قالادان سىرتقا اعىلدى. كوشەلەردەگى قاتتى كەپتەلىسكە قوسا جانارماي قۇيۋ بەكەتتەرىندە ۇزاق سونار كەزەك بولعان.
جەر سىلكىنىسىنەن بىرنەشە ادامنىڭ زارداپ شەككەنى حابارلاندى. ءۇش تۇرعىن كوپقاباتتى ءۇيدىڭ ەكىنشى جانە ءۇشىنشى قاباتىنان سەكىرىپ، مەرتىككەن.
