ششۋچينسك قالاسىنىڭ اتىن ابىلاي حان دەپ وزگەرتۋ تۋرالى ءسوز قوزعالىپ جاتىر، دەپ حابارلايدى “ادىرنا” ۇلتتىق پورتالى.
اقمولا وبلىسى اكىمدىگىندە وتكەن بريفينگتە جۋرناليستەر مارقۇم قۇرمەتتى تاريحشىنىڭ كوپتەن بەرى ايتىلىپ جۇرگەن ششۋچينسك قالاسىنىڭ اتىن ابىلاي حان دەپ وزگەرتۋ تۋرالى ۇسىنىسىن سۇراپ ءبىلدى.
«بۇل ماسەلە جان-جاقتى تالقىلانىپ، قوعامدىق تىڭداۋلاردان كەيىن – ءبىر ادامنىڭ ەمەس، حالىقتىڭ كوپشىلىگىنىڭ پىكىرىن ەسكەرگەننەن كەيىن شەشىلۋ كەرەك. سوسىن بارىپ ءتيىستى باستاما ماسليحاتقا جىبەرىلىپ، شەشىم قابىلدانادى. ال، نەگىزى، كۇن تارتىبىندە ەلدى مەكەندەردىڭ اتاۋلارىن وزگەرتۋگە قاتىستى مۇنداي ماسەلەلەر جوق»، - دەپ ءتۇسىندىردى اقمولا وبلىسىنىڭ اكىمى مارات احمەتجانوۆ.
بۇل باستامانى 2013 جىلى كوتەرگەن تاريحشى، قازاقستاننىڭ ەڭبەك سىڭىرگەن قايراتكەرى، پروفەسسور قادىرجان ابۋەۆ بولاتىن.
«50 جىل بويى حان ابىلايدىڭ شتابى بۋراباي تراكتىندە بولدى. بيىل 2013 جىلى ونىڭ تۋعانىنا 300 جىل تولادى، وسىعان بايلانىستى ششۋچينسك قالاسىن ابىلاي حان قالاسى دەپ وزگەرتۋ تۋرالى ۇسىنىس جاساپ وتىرمىن»، – دەپ جازعان ەدى تاريح عىلىمدارىنىڭ دوكتورى.
بۇل ماسەلەگە ارقاۋ بولعان تاريحي فاكت – بۋراباي كۋرورتى قازاق حانى ابىلايدىڭ رەسمي ورنى بولعان.
“ادىرنا” ۇلتتىق پورتالى
