وسىدان 84 جىل بۇرىن عالىم-ادەبيەتتانۋشى، قازاقستاننىڭ حالىق جازۋشىسى، فيلولوگيا عىلىمدارىنىڭ كانديداتى مۇحتار ماعاۋين دۇنيەگە كەلدى.
مۇحتار مۇقانۇلى 1940 جىلى 2 اقپاندا سەمەي وبلىسىنىڭ شۇبارتاۋ اۋدانىندا تۋعان. 1962 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن، 1965 جىلى ونىڭ اسپيرانتۋراسىن بىتىرگەن.
ەڭبەك جولىن 1965 جىلى باستادى. «قازاق ادەبيەتى» گازەتىندە ءبولىم مەڭگەرۋشىسى، 1967-1971 جىلدارى «جازۋشى» باسپاسىندا باس رەداكتوردىڭ ورىنباسارى، قازاق كسر عىلىم اكادەمياسىنىڭ م.اۋەزوۆ اتىنداعى ادەبيەت جانە ونەر ينستيتۋتىندا اعا عىلىمي قىزمەتكەرى بولدى. ماسكەۋدە م.گوركي اتىنداعى ادەبيەت ينستيتۋتىندا قازاق فولكلورى مەن قازاق ادەبيەتى تاريحى بويىنشا ارنايى لەكتسيالىق كۋرستار جۇرگىزدى.
1965-1986 جىلدارى «قازاق ادەبيەتى» گازەتىندە ءبولىم مەڭگەرۋشىسى، «جازۋشى» باسپاسىندا، «جالىن» الماناعىندا باس رەداكتوردىڭ ورىنباسارى، ادەبيەت جانە ونەر ينستيتۋتىندا، قازپي-دا اعا عىلىم قىزمەتكەر، دوتسەنت، «جازۋشى» باسپاسىندا باس رەداكتور قىزمەتتەرىن اتقاردى. «كەشقۇرىم» اتتى تۇڭعىش اڭگىمەسى «جۇلدىز» جۋرنالىندا جاريالاندى.
ءار جىلدارى «اقشا قار»، «ءبىر اتانىڭ بالالارى»، «قيانداعى قىستاۋ»، «كوك كەپتەر» اڭگىمە، پوۆەستەر جيناقتارى مەن «كوك مۇنار»، «شاقان شەرى» روماندارى جارىق كوردى. سونداي-اق قازاق حالقىنىڭ كورشى مەملەكەتتەرمەن ديپلوماتيالىق قارىم-قاتىناسى تاريحي-كوركەمدىك تۇرعىدان تۇڭعىش رەت سۋرەتتەلگەن «الاساپىران» تاريحي رومان-ديلوگياسى، «مەن» عۇمىرباياندىق رومان-حامساسى، «قۇمىرسقا-قىرعىن» اڭگىمەلەر جيناعى، «ۇلتسىزدانۋ ۇرانى» ماقالالار جيناعى جانە تاعى باسقا كىتاپتارى دا وقىرمانعا جول تارتتى.
