قىتاي توراعاسى سي تسزينپين ءبىر توپ ديپلوماتتىڭ قاتارىندا اۋعانستاننىڭ قىتايداعى جاڭا ەلشىسىنەن دە سەنىم گراموتاسىن قابىلدادى. بۇل تۋرالى قىتاي سىرتقى ىستەر مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
30 قاڭتاردا حالىق ءماجىلىس زالىندا وتكەن سالتاناتتى راسىمدە 42 ەلدىڭ ەلشىلەرى سي تسزينپينگە سەنىم گراموتالارىن تاپسىردى. ولاردىڭ اراسىندا بۇرىن «تاليبان» ۇكىمەتىنىڭ ءباسپاسوز حاتشىسىنىڭ ورىنباسارى قىزمەتىن اتقارعان بيلال كاريمي دە بار.
بۇعان دەيىن قىتاي تالىپتەر بيلىككە كەلگەننەن كەيىن اۋعانستانعا رەسمي تۇردە جاڭا ەلشى تاعايىنداعان العاشقى ەل بولدى.
چجاو شەن 13 قىركۇيەكتە كابۋلدا وتكەن سالتاناتتى شارادا اۋعانستاننىڭ ءىس جۇزىندەگى ۇكىمەتىنىڭ باسشىسى مۇحاممەد حاسان احۋندقا سەنىم گراموتاسىن تاپسىردى. قىتاي بيلىگى چجاو شەننىڭ تاعايىندالۋى «تاليبان» ۇكىمەتىن رەسمي تانۋعا ازىرلىك بەلگىسى بولىپ تابىلا ما، جوق پا، سونى ناقتىلاعان جوق.
«بۇل قىتايدىڭ اۋعانستانداعى ەلشىسىنىڭ ادەتتەگى روتاتسياسى جانە قىتاي مەن اۋعانستان اراسىنداعى ديالوگ پەن ىنتىماقتاستىقتى ودان ءارى دامىتۋعا باعىتتالعان. قىتايدىڭ اۋعانستانعا قاتىستى ساياساتى ايقىن جانە دايەكتى»، - دەپ اتاپ ءوتتى قىتاي سىرتقى ىستەر مينيسترلىگى.
تاليبان كابۋلدى 2021 جىلدىڭ 15 تامىزىندا باسىپ الىپ، ءۇش اپتادان كەيىن جاڭا ۇكىمەتتىڭ تاعايىندالعانىن جاريالادى. بىراق الەمنىڭ بىردە-ءبىر مەملەكەتى بۇل قوزعالىستى اۋعانستاننىڭ زاڭدى ۇكىمەتى دەپ رەسمي تۇردە ءالى مويىنداعان جوق.
الەمدىك قاۋىمداستىق جاڭا بيلىكتەن اۋعانستانداعى ءتۇرلى ەتنوساياسي كۇشتەردىڭ وكىلدەرىن، سونداي-اق تالىپتەر كەزىندە قۇقىقتارى ايتارلىقتاي شەكتەلگەن ايەلدەردى قامتيتىن كواليتسيالىق ۇكىمەت قۇرۋدى تالاپ ەتۋدە. ءوز كەزەگىندە تالىپتەر بارلىعىمەن جاقسى قارىم-قاتىناستا بولعىسى كەلەتىندەرىن ايتىپ، ەۋروپا ەلدەرىن كابۋلداعى ەلشىلىكتەرىن قايتا اشۋعا شاقىرۋدا.
