رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا رەسەيدىڭ ورتالىق ازيا ءوڭىرى ەلدەرىمەن قارىم-قاتىناسى جايلى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
سوڭعى ۋاقىتتا ورتالىق ازيا ەلدەرىنە قاتىستى رەسەيلىك ۇگىت-ناسيحاتشىلار قيسىنسىز مالىمدەمەلەر جاساي باستاعان. سونىڭ سوڭعىسى رەسەيلىك نتۆ ارناسىنداعى "مەستو ۆسترەچي" باعدارلاماسىندا تاريحشى ميحايل سمولين "رەۆوليۋتسياعا دەيىن قازاق جانە وزبەك دەگەن ۇلت بولماعان" دەگەن پىكىر ايتىپ، سىننىڭ استىندا قالعان ەدى.
وسىعان قاتىستى رەسەي ءسىم وكىلىنىڭ جاۋابى مينيسترلىكتىڭ رەسمي سايتىندا جاريالاندى.
"رەسەي مەن ورتالىق ازيا رەسپۋبليكالارىن ورتاق تاريح، تىعىز ادامي جانە گۋمانيتارلىق بايلانىستار، ساۋدا-ەكونوميكالىق جانە ىسكەرلىك بايلانىستاردىڭ مىڭداعان «جىپتەرى» بىرىكتىرەدى. ءبىزدىڭ شىنايى ءوزارا ارەكەتتەرىمىز، ستراتەگيالىق سەرىكتەستىگىمىز جانە كوپتەگەن تۇرلىشە وداقتاستىعىمىز ءبىر-ءبىرىن قۇرمەتتەۋگە جانە مادەني ديالوگقا نەگىزدەلگەن، ءبىزدى ءوزىنىڭ تاريحي تەرەڭدىگىمەن جانە بۇكىل ادامزات ءۇشىن قۇندىلىعىمەن بايىتادى. رەسەي جانە ورتالىق ازيا ءوڭىرىنىڭ ەگەمەن، تاۋەلسىز مەملەكەتتەرى مۇنداي قارىم-قاتىناستاردىڭ ماڭىزدىلىعىن تولىق تۇسىنەتىنىنە سەنىمدىمىز. اتالعان مالىمدەمەلەر تازا سۋبەكتيۆتى سيپاتتا، جوعارىدا ايتىلعان پىكىرمەن ەشقانداي ورتاقتىعى جوق جانە تولىعىمەن اۆتوردىڭ ار-وجدانىندا قالادى" دەپ مالىمدەدى زاحاروۆا.
