Reseı syrtqy ister mınıstrliginiń resmı ókili Marııa Zaharova Reseıdiń Ortalyq Azııa óńiri elderimen qarym-qatynasy jaıly túsinikteme berdi, dep habarlaıdy "Adyrna" ulttyq portaly.
Sońǵy ýaqytta Ortalyq Azııa elderine qatysty reseılik úgit-nasıhatshylar qısynsyz málimdemeler jasaı bastaǵan. Sonyń sońǵysy reseılik NTV arnasyndaǵy "Mesto vstrechı" baǵdarlamasynda tarıhshy Mıhaıl Smolın "revolıýııaǵa deıin qazaq jáne ózbek degen ult bolmaǵan" degen pikir aıtyp, synnyń astynda qalǵan edi.
Osyǵan qatysty Reseı SIM ókiliniń jaýaby mınıstrliktiń resmı saıtynda jarııalandy.
"Reseı men Ortalyq Azııa respýblıkalaryn ortaq tarıh, tyǵyz adamı jáne gýmanıtarlyq baılanystar, saýda-ekonomıkalyq jáne iskerlik baılanystardyń myńdaǵan «jipteri» biriktiredi. Bizdiń shynaıy ózara áreketterimiz, strategııalyq seriktestigimiz jáne kóptegen túrlishe odaqtastyǵymyz bir-birin qurmetteýge jáne mádenı dıalogqa negizdelgen, bizdi óziniń tarıhı tereńdigimen jáne búkil adamzat úshin qundylyǵymen baıytady. Reseı jáne Ortalyq Azııa óńiriniń egemen, táýelsiz memleketteri mundaı qarym-qatynastardyń mańyzdylyǵyn tolyq túsinetinine senimdimiz. Atalǵan málimdemeler taza sýbektıvti sıpatta, joǵaryda aıtylǵan pikirmen eshqandaı ortaqtyǵy joq jáne tolyǵymen avtordyń ar-ojdanynda qalady" dep málimdedi Zaharova.
