ءداستۇرلى اقسۋات ايتىسىنىڭ بيىلعى ستيپەندياسى باياناۋىلدىڭ جارىق جۇلدىزى اسپانبەك شۇعاتاەۆقا بۇيىردى. ول ەندى جىل بويى ايتىس دەمەۋشىسىنەن اي سايىن 200 مىڭ تەڭگە شاكىرتاقى الىپ وتىرادى.
شقو تارباعاتاي اۋدانىندا "رۋحاني جاڭعىرۋ" باعدارلاماسى اياسىندا جىر الىپتارىنىڭ ءدۇبىرلى دوداسى ونەر سۇيەر قاۋىمدى ءتانتى ەتتى. جىر سايىسىن ءجۇرسىن ەرمان جۇرگىزدى. 
ال قازىلار القاسىنا قازاقستان جازۋشىلار وداعىنىڭ توراعاسى ۇلىقبەك ەسداۋلەت باستاعان اقىن سەرىك قاليەۆ، داۋلەتكەرەي كاپۇلى، باۋىرجان قاليوللا سىندى اقىندار مەن التىنبەك قورازباەۆ سىندى سازگەرلەر تورەلىك ەتتى. سۋىرىپ سالما اقىندار قوعامداعى ماسەلەلەردى تىلگە تيەك ەتىپ، تۇيتكىلدى تاقىرىپتاردى قوزعاي ءبىلدى.
قىرعىزستان، موڭعوليا، قىتاي جانە ەلىمىزدىڭ ءار تۇكپىرەن كەلگەن التى جۇپ اقىننىڭ التاۋى كەلەسى اينالىمعا ءوتتى. سوڭعى سايىستىڭ العاشقى جۇبى بولىپ شىققان اقسۋاتتىڭ تۋماسى رۇستەم قايىرتايۇلى مەن جايىقتىڭ جانسايا مۋسيناسى باياعى داستۇرلەرىنەن جازباي قىز بەن جىگىتتىڭ ايتىسىن ادەمى ءورىپ شىقتى.
سوڭعى جۇپ بولىپ شىققان سىر سۇلەيى مۇحتار نيازوۆ پەن قىتايلىق ەرلان امانقوجاۇلىنىڭ اراسىنداعى تارتىس قىزىقتى ءوتتى. «سەنىڭ ءتىلىڭ شالقۇيرىق، مەنىڭ تىلىمدە شىدەر بار» دەپ جىرلاعان ەرلانعا وسى ايتىستىڭ باس جۇلدەسىنە تىگىلگەن ەكى ميلليون تەڭگە بۇيىردى. ءبىرىنشى ورىن قاناتتا، ەكىنشى، ءۇشىنشى ورىندى جانسايا مەن رۇستەم ەنشىلەدى.
"ادىرنا" ۇلتتىق پورتالى
