بەلگىلى يمام نۇرلان بايجىگىتۇلى اقش پرەزيدەنتى دجو بايدەنمەن جۇزدەسپەك. كەزدەسۋ قاڭتار ايىنىڭ سوڭىنا جوسپارلانىپ وتىر، دەپ حابارلايدى «ادىرنا» ءتىلشىسى orda.kz-كە سىلتەمە جاساپ.
«جىل سايىن اقش پرەزيدەنتى الەم كوشباسشىلارىنىڭ، تانىمال تۇلعالاردىڭ جانە ءارتۇرلى ەلدەردىڭ ىقپالدى تۇلعالارىنىڭ قاتىسۋىمەن قايىرىمدىلىق كەشىن وتكىزەدى. شاقىرۋدى پوشتا ارقىلى العاندا مەن قاتتى قۋاندىم. ويتكەنى بۇل كەزدەسۋ — الەمدىك قاۋىمداستىقتا تۇراقتىلىق پەن كەلىسىمدى قامتاماسىز ەتۋگە باعىتتالعان ىنتىماقتاستىق ستراتەگيالارىن تالقىلاۋ الاڭى. بۇل ساپارعا مەملەكەتىمىزدىڭ مۇددەسىن، ىشكى جانە سىرتقى ساياساتىمىزدى جەتكىزۋ، سونداي-اق رۋحانياتتى كەڭىنەن تانىتۋ جانە قازاق تاريحىنىڭ قانشالىقتى اۋقىمدى ەكەنىن كورسەتۋ ءۇشىن بارامىن»،—دەدى ول.
بۇدان بولەك يمام اق ۇيدە جوسپارلانعان ءۇش استىڭ بارىنە دە قاتىساتىنىن ايتتى.
«بۇعان دەيىن وڭتۇستىك كورەيا مەن رەسەيدە ۇيىمداستىرىلعان شارالارعا قاتىستىم. ەندى مەنى اقش-قا شاقىردى. ماعان قازىردىڭ وزىندە 10 جىلدىق ۆيزا ماقۇلداندى»، - دەپ تۇيىندەدى نۇرلان يمام.
سونداي-اق ول اقش-تا تۇرىپ جاتقان جانە جۇمىس ىستەيتىن قازاقستاندىقتارمەن كەزدەسۋ ۇيىمداستىرماق نيەتتە.
الەۋمەتتىك جەلى ارقىلى تانىمال بولعان جانە ارىپتەستەرى ءجيى سىنايتىن نۇرلان يمامنىڭ اق ۇيدەگى استىڭ بارلىعىنا قاتىسۋى جانە 10 جىلدىق ۆيزا اشتىرتۋى ەرەكشە نازار اۋدارتادى.
