Belgili ımam Nurlan Baıjigituly AQSh prezıdenti Djo Baıdenmen júzdespek. Kezdesý qańtar aıynyń sońyna josparlanyp otyr, dep habarlaıdy «Adyrna» tilshisi orda.kz-ke silteme jasap.
«Jyl saıyn AQSh prezıdenti álem kóshbasshylarynyń, tanymal tulǵalardyń jáne ártúrli elderdiń yqpaldy tulǵalarynyń qatysýymen qaıyrymdylyq keshin ótkizedi. Shaqyrýdy poshta arqyly alǵanda men qatty qýandym. Óıtkeni bul kezdesý — álemdik qaýymdastyqta turaqtylyq pen kelisimdi qamtamasyz etýge baǵyttalǵan yntymaqtastyq strategııalaryn talqylaý alańy. Bul saparǵa memleketimizdiń múddesin, ishki jáne syrtqy saıasatymyzdy jetkizý, sondaı-aq rýhanııatty keńinen tanytý jáne qazaq tarıhynyń qanshalyqty aýqymdy ekenin kórsetý úshin baramyn»,—dedi ol.
Budan bólek ımam Aq úıde josparlanǵan úsh astyń bárine de qatysatynyn aıtty.
«Buǵan deıin Ońtústik Koreıa men Reseıde uıymdastyrylǵan sharalarǵa qatystym. Endi meni AQSh-qa shaqyrdy. Maǵan qazirdiń ózinde 10 jyldyq vıza maquldandy», - dep túıindedi Nurlan ımam.
Sondaı-aq ol AQSh-ta turyp jatqan jáne jumys isteıtin qazaqstandyqtarmen kezdesý uıymdastyrmaq nıette.
Áleýmettik jeli arqyly tanymal bolǵan jáne áriptesteri jıi synaıtyn Nurlan ımamnyń Aq úıdegi astyń barlyǵyna qatysýy jáne 10 jyldyq vıza ashtyrtýy erekshe nazar aýdartady.
