سەمەي قالاسىنىڭ اكىمى ەرماك ءسالىموۆ مەديتسينا قىزمەتكەرلەرىن كاسىبي مەرەكەلەرىمەن قۇتتىقتادى. قالا باسشىسى ەرەكشە كوزگە تۇسكەن دارىگەرلەردى ماراپاتتاپ، قۇرمەت گراموتالارىن تابىس ەتتى.
- دارىگەر ەڭ ىزگى ماماندىق، - دەدى ەرماك بيداحمەتۇلى. – سىزدەردى كاسىبي مەرەكەلەرىڭىزبەن قۇتتىقتاعىم كەلەدى. سىزدەرگە باقىت جانە اۋىر جۇمىستارىڭىزعا تابىس تىلەيمىن.
كەزدەسۋ بارىسىندا ە. ءسالىموۆ مەديتسينا ۋنيۆەرسيتەتىنىڭ رەكتورى ەرسىن جۇنىسوۆپەن ءوزارا ىنتىماقتاستىق تۋرالى مەموراندۋمعا قول قويدى. بۇل قۇجاتتىڭ كومەگىمەن جوعارى وقۋ ورنى اباي الاڭىن ءوز قامقورلىعىنا الاتىن بولادى.
- مەديتسينالىق ۋنيۆەرسيتەت بىزگە اباي الاڭىن بەرۋ تۋرالى ءوتىنىش ءبىلدىردى. ولار وسى اۋماقتا ساپالى اباتتاندىرۋ جۇمىستارىن جۇرگىزگىسى كەلەدى. باسقا وقۋ ورىندارى دا ۇلگى الار دەگەن نيەتپەن بۇل ۇسىنىستى قابىل الدىق. ۇنەمدەلگەن قارجى قالانىڭ شەتكى بولىكتەرىنە جۇمسالادى، - دەدى ەرماك بيداحمەتۇلى.
سونىمەن قاتار، وسى مەموراندۋم اياسىندا اكىمدىك مەلكومبينات كوشەسىندەگى عيماراتتى مەدۋنيۆەرسيتەتتىڭ كوممۋنالدىق مەنشىگىنە بەردى.
- بۇل نىسان حالىق قاجەتتىلىگىنە پايدالانىلۋى ءتيىس، - دەدى قالا اكىمى. - مەموراندۋمدا كورسەتىلگەن ءۇشىنشى ماسەلە-مەديتسينا قىزمەتكەرلەرىن تۇرعىن ۇيمەن قامتاماسىز ەتۋ. قازىر قاراعايلى ىقشام اۋدانىندا ۇيلەر سالىنىپ جاتىر. دارىگەرلەر تۇرعىن ءۇي قۇرىلىس جيناق بانكى ارقىلى مەملەكەتتىك باعدارلاما بويىنشا تۇرعىن ءۇي الا الادى، -دەدى ەرماك بيداحمەتۇلى.
"ادىرنا" ۇلتتىق پورتالى
