«قازاقتەلەكوم» اق 25 ملن تەڭگەگە جارنامالىق وبەكتىلەردىڭ يدەياسى مەن ديزاينىن ازىرلەۋ بويىنشا قىزمەتتەرگە اشىق تەندەر جاريالادى، دەپ حابارلايدى «ادىرنا» ۇلتتىق پورتالى.
بايقاۋدى «تەلەكوم كومپلەكت» ديرەكتسياسى اق فيليالى ۇيىمداستىرىپ وتىر. شارت بويىنشا قىزمەت كورسەتۋ مەرزىمى، قول قويىلعان كۇننەن باستاپ 2024 جىلعى مامىرعا دەيىن. تولەم جوبا اياقتالعاننان كەيىن جۇرگىزىلەتىنى اتاپ وتىلگەن.
تەحنيكالىق ەرەكشەلىككە سايكەس، جوسپارلانعان قىزمەتتەردىڭ ماقساتى «قازاقتەلەكوم» اق-نىڭ 2023 جىلعا ارنالعان ينتەگراتسيالىق جىلدىق ەسەبىن، ونىڭ ىشىندە قارجىلىق ەمەس اقپاراتتار بولىگىن تۇراقتى دامۋ سالاسىنداعى ۇزدىك حالىقارالىق پراكتيكالارعا سايكەس ەتىپ دايىنداۋ.
قۇجاتتا ازىرلەنگەن جىلدىق ەسەپ جەتەكشى سالالىق كومپانيالاردىڭ ەسەپتەرىن دايىنداۋ جونىندەگى پراكتيكالارعا سايكەس كەلۋى جانە اكتسيونەرلىك قوعامنىڭ قىزمەتىنىڭ اشىقتىعىنا باعىتتالۋى كەرەك. جانە سول ارقىلى ىشكى جانە سىرتقى مۇددەلى تاراپتار، ونىڭ ىشىندە الەۋەتتى ينۆەستورلار تاراپىنان سەنىمدى ارتتىرۋعا باعىتتالۋى ءتيىس دەلىنگەن.
انىقتاما ءۇشىن: قارجىلىق ەمەس ەسەپتىلىك – بۇل كومپانيانىڭ الەۋمەتتىك، ەكولوگيالىق، ەكونوميكالىق جانە باسقا دا دامۋ سالاسىنداعى قىزمەتىنىڭ ناتيجەلەرى مەن نەگىزگى كورسەتكىشتەرىن كەشەندى تۇردە كورسەتەتىن كورپوراتيۆتى ەسەپتىلىك باعىتى.
الەۋەتتى ءونىم بەرۋشىگە قويىلاتىن تالاپتارعا كەلەتىن بولساق، جىلدىق ەسەپتى ازىرلەۋ «قازاقتەلەكوم» اق كورپوراتيۆتىك باسقارۋ كودەكسىنىڭ بارلىق تالاپتارىنا، «سامۇرىق-قازىنا» اق تالاپتارىنا جانە بۇۇ-نىڭ تۇراقتى دامۋ سالاسىنداعى ماقساتتارىنا، سونداي-اق جەتەكشى حالىقارالىق كومپانيالاردىڭ قارجىلىق ەمەس ەسەپتىلىك ستاندارتتارىنىڭ تالاپتارىنا سايكەس كەلۋى ءتيىس.
ەسەپ قارجى جىلى ىشىندە اق قىزمەتىنىڭ دامۋى مەن تيىمدىلىگىن تالداۋدى كورسەتۋ كەرەك جانە تيىمدىلىكتىڭ نەگىزگى قارجىلىق (جانە باسقا) كورسەتكىشتەرىن تالقىلاۋدى قامتۋى قاجەت. سونداي-اق، ەسەپتە: ۇيىمنىڭ نەگىزگى ماڭىزدى وقيعالارى، ونىڭ دامۋى، عىلىمي-زەرتتەۋ جۇمىستارى مەن جاڭالىقتارى، ءوز اكتسيالارىن ساتىپ الۋ تۋرالى اقپارات جانە باسقا دا ەڭبەكتەرى كورسەتىلۋى كەرەك.
ەسەپتىڭ ديزاين-تۇجىرىمداماسى فيرمالىق ستيل ەلەمەنتتەرىن جانە كورپوراتيۆتىك برەندبۋك تالاپتارىن ەسكەرە وتىرىپ، فوتوسۋرەتتەر، يلليۋستراتسيالار، ينفوگرافيكا جانە باسقا ۆيزۋالدى ەلەمەنتتەردى پايدالانا وتىرىپ، ءۇش تىلدە (ورىس، قازاق، اعىلشىن) ياعني، پرەزەنتاتسيا ءۇش نۇسقادا دايىندالۋى شارت دەلىنگەن.
قاراپايىم تىلمەن ايتقاندا، «قازاقتەلەكوم» اق ءوز ۇيىمىنىڭ ساپالى جاڭا ۇلگىدەگى پرەزەنتاتسياسىنا 25 ملن. تەڭگە جۇمساماق. سۋپەر - پرەزەنتاتسيانى ازىرلەۋ پروتسەسىنە مىندەتتى تۇردە دەرەكتەردى جيناۋ جانە تالداۋ، ءماتىندى دايىنداۋ جانە اۋدارۋ، MS PowerPoint جانە Adobe Photoshop/INDD فورماتىنداعى ءۇش تىلدەگى ەلەكتروندىق ماكەت جانە سوڭعى ينتەراكتيۆتى نۇسقا كىرەدى.
بۇدان باسقا، باستاپقى كەزەڭدە قارجىلىق ەمەس ەسەپتىلىك ستاندارتتارىنىڭ (GRI Standards, SASB, IIRC) نەگىزگى قاعيداتتارى بويىنشا كورپوراتيۆتىك ترەنينگ وتكىزىلەتىن بولادى. ايتا كەتەيىك، «قازاقتەلەكوم» اق قارقىندى سىلتەمە جاساپ وتىرعان بارلىق حالىقارالىق ستاندارتتار تۋرالى اشىق قولجەتىمدى دەرەك كوزدەرىنەن تەگىن بىلۋگە بولادى. ءدال وسى جەردە نەندەي قىزمەت 25 ملن. تەڭگە تۇراتىنى بىزگە تۇسىنىكسىز.
بالكىم، «قازاقتەلەكوم» اق شىنىمەن جاڭا سۋپەر-پرەزەنتاتسياعا اسا مۇقتاج شىعار؟! ال حالىق بولسا «قازاقتەلەكوم» اق-نىڭ ساپالى قىزمەتىنە مۇقتاج ەكەنىن كۇندە ەستىپ، كورىپ ءجۇرمىز.
اسحات احمەديار
