وزبەكستان قازاقستاننىڭ ەكولوگيالىق زياندى وتىن وندىرىسىنەن باس تارتۋ تاجىريبەسىن قولدانىستا پايدالانۋعا نيەتتى، دەپ حابارلايدى “ادىرنا” ۇلتتىق پورتالى 24KZ سايتىنا سىلتەمە جاساپ.
ءبىزدىڭ ەل اي-80 ماركالى بەنزيندى ءوندىرۋدى التى جىل بۇرىن توقتاتقان. ودان كەيىن وتاندىق زاۋىتتار K4 جانە K5 ستاندارتتارىنا ساي ءونىم شىعارۋعا دەن قويدى.
ال وزبەكستاندا اي-80 ءالى دە كەڭىنەن قولدانىلادى. مۇناي وڭدەۋ زاۋىتتارى ءوندىرىستى قىسقارتپاي وتىر. جاعداي 2026 جىلعا قاراي وزگەرەدى دەپ كۇتىلۋدە. ۇكىمەت الداعى 2 جىلدا ءوندىرىستى ەكولوگياعا زياندى بەنزين تۇرىنەن ەۋروپالىق ستاندارتتارعا ساي كەلەتىن جوعارى وكتاندى بەنزينگە قايتا باعىتتاۋدى كوزدەپ وتىرعانى بەلگىلى بولدى.
“ارينە حالىق وسى ارزان، تانىمال ماركالى بەنزينگە ۇيرەنىپ قالعان. ويتكەنى بۇل جاي عانا ارزانىراق. ادامدار جوعارى سورتتى بەنزينگە اۋىسا المايدى. ويتكەنى ولار قىمباتىراق. جەكە جانارماي قۇيۋ بەكەتتەرىندە اي-80 8 مىڭعا جۋىق بولسا، 92 كەم دەگەندە 12 مىڭ سوم تۇرادى”، - دەپ جەتكىزدى ەنەرگەتيكا ساراپشىسى باحتيور ەرگاشەۆ.
ءولاردىڭ ايتۋىنشا، وتىننىڭ باسقا تۇرلەرى كوپشىلىك ءۇشىن قولجەتىمسىز بولىپ بارادى. ال ولارعا سۇرانىس از. مىسالى، Global Petrol Prices مالىمەتتەرى بويىنشا، كورشىلەرىمىزدە اي-95 ءبىر ءليترى ءبىر دوللاردان قىمبات. قىرعىزستانداعى باعا دا وسىنداي. ال قازاقستاندا، تۇركىمەنستاندا، ءازىربايجاندا ەكى ەسە ارزان. ءبىزدىڭ ەل بەنزين باعاسىنىڭ الەمدىك تىزىمىندە 11-ءشى ورىندا. مامانداردىڭ ايتۋىنشا، باعا ەلىمىزدەگى مۇناي ءوندىرۋ كولەمىنە تىكەلەي بايلانىستى. يمپورتتاۋشى ەلدەر ءۇشىن سوڭعى ءونىم قىمباتىراق تۇرادى.
“ادىرنا” ۇلتتىق پورتالى
