كوكشەتاۋداعى نازارباەۆ كوشەسىندە سۋبۇرقاق اتقىلادى. بۇل وقيعاعا قاتىستى قالا اكىمدىگى وكىلدەرى تۇسىنىك بەردى، دەپ حابارلايدى «ادىرنا” ۇلتتىق پورتالى.
جەلىدە جاريالانعان ۆيدەوكادرلاردا جول بويىندا 2-3 مەتردەي بيىكتىككە دەيىن سۋ اتقىلاعان. بۇل جايت بويىنشا كوكشەتاۋ اكىمدىگىنىڭ وكىلدەرى پىكىر ءبىلدىردى.
«نازارباەۆ كوشەسىندە گيدرانتتاردا اقاۋ شىقتى. قازىرگى ۋاقىتتا اقاۋدىڭ سەبەپتەرى انىقتالىپ، جويۋ بويىنشا جۇمىستارى جۇرگىزىلۋدە. قالا تۇرعىندارىنان پايدا بولعان ولقىلىقتار ءۇشىن كەشىرىم سۇرايمىز»، - دەلىنگەن حابارلامادا.
وقيعا ورنىنا كوكشەتاۋ قالاسىنىڭ اكىمى باۋىرجان عايسا بارىپ، اقاۋدىڭ سەبەپتەرىن ءبىلدى.
«اقاۋدى جويۋعا "سۋ ارناسى" مەكەمەسى مەن ءورت ءسوندىرۋ قىزمەتكەرلەرى جۇمىلدىرىلدى. قازىرگى ۋاقىتتا سۋ سەرپىنى توقتاتىلدى، جوندەۋ-قالپىنا كەلتىرۋ جۇمىستارى جۇرگىزىلۋدە»، - دەپ حابارلادى اكىمدىكتەن.
