«اگرارلىق نەسيە كورپوراتسياسى» اق اقتوبە فيليالى ديرەكتورىنىڭ بۇرىنعى ورىنباسارى الاياقتىق ارەكەتى ءۇشىن سوتتالدى، دەپ حابارلايدى “ادىرنا” ۇلتتىق پورتالى.
قما ءباسپاسوز قىزمەتىنىڭ مالىمەتىنشە، سوتقا دەيىنگى تەرگەپ-تەكسەرۋ بارىسىندا شارۋا قوجالىعىنىڭ باسشىسى شەتەلدەن اكەلىنگەن 277 باس اسىل تۇقىمدى مالدى ساتىپ الۋ ءۇشىن «سىباعا» باعدارلاماسى بويىنشا نەسيە جەلىسىن اشۋ تۋرالى وتىنىشپەن كورپوراتسيا فيليالىنا جۇگىنگەنى انىقتالدى.
وعان 90 ملن تەڭگە كولەمىندە نەسيە قاراجاتى ءبولىندى. وسىدان كەيىن سوتتالعان ازامات شارۋا قوجالىعىنىڭ باسشىسىن الداۋ ارقىلى رەسەيدەن مال ساتىپ الۋ-جەتكىزۋ تۋرالى جشس-مەن شارت جاساتقان، – دەدى قما رەسمي وكىلى الىبەك ءابدىلوۆ.
شارۋا قوجالىعىنىڭ باسشىسى ەسەپ ايىرىسۋ شوتىنا 90 ملن تەڭگە اۋدارعان، بىراق بۇل قاراجاتتى كورپوراتسيانىڭ اقتوبە فيليالى ديرەكتورىنىڭ ورىنباسارى جەكە قاجەتتىلىكتەرىنە جۇمساعان.
ول بەس جىلعا باس بوستاندىعىنان ايىرىلدى.
