ەكىباستۇز جەو-دا تاعى ءبىر توتەنشە جاعداي بولدى، دەپ حابارلايدى "ادىرنا" ءتىلشىسى "ەكيباستۋزتەپلوەنەرگو" جشس الەۋمەتتىك جەلىدەگى پاراقشاسىنا سىلتەپ.
جەو-دا كۇل قۇبىرى زاقىمدانعان. قازىر ىستىق رەزەرۆتەگى ەكى ەنەرگەتيكالىق قازاندىق اگرەگاتى ىسكە قوسىلىپتى.
سوڭعى اقپارات بويىنشا، اقاۋلىقتىڭ سالدارىنان سۋ جىلىتۋ قازاندىقتارىنىڭ سورعى بولمەسىن سۋ باسقان. ەكىباستۇز قالالىق تج باسقارماسى مەن ەجەس پەرسونالى سۋدى سورۋ جۇمىسىن جۇرگىزىپ جاتىر.
"ەكيباستۋزتەپلوەنەرگو" جشس Instagram پاراقشاسىندا سورعى ستانتسياسىن ىسكە قوسۋ ءۇشىن قوسىمشا قوزعالتقىش ازىرلەنگەنىن جازدى. قازىرگى ۋاقىتتا ستانتسيادا 7 قازاندىق اگرەگاتى جۇمىس ىستەيدى (Nº 5, 6, 7, 9, 11, 13, 14), ونىڭ ىشىندە سۋ جىلىتۋ تسەحىنىڭ قازاندىعى بەلگىلى ءبىر ارالىقتا مازۋتپەن جۇمىس ىستەيدى.
كومپانيانىڭ بەرگەن اقپاراتىندا:
"جەتكىزۋ تەمپەراتۋراسى 70 گرادۋس، گيدراۆليكالىق قىسىم بەكىتىلگەن رەجيم اياسىندا قامتاماسىز ەتىلگەن: جەتكىزىلىمدە 9 كگ جانە قايتارىمدا 1,5 كگ. الداعى ۋاقىتتا باگەرلىك سورعىنى ىسكە قوسۋ جۇمىستارى اياقتالادى، سودان كەيىن كەستەگە سايكەس كومىرمەن سۋ جىلىتۋ قازاندىقتارىنىڭ ستاندارت جۇمىسى قامتاماسىز ەتىلەدى", - دەلىنگەن.
