تارازدا مۇقاعالي ماقاتاەۆتىڭ شىعارماشىلىعى وسكەلەڭ ۇرپاققا دارىپتەلدى

3872
Adyrna.kz Telegram

تارازدا اقيىق اقىن مۇقاعالي ماقاتاەۆتى ەسكە الۋ كەشى ءوتتى. شاراعا الماتى، جامبىل، قىزىلوردا جانە تۇركىستان وبلىستارىنان رەسپۋبليكاعا تانىمال اقىن، جازۋشىلار، مادەنيەت جانە ونەر قايراتكەرلەرى قاتىستى. پوەزيا پاتشاسىنىڭ تۋعان كۇنىنە ۇيىمداستىرىلعان كەشكە ونىڭ ۇلى مەن كەلىنى ارنايى شاقىرتىلىپ، قوناق بولدى. تاعىلىمى مول ادەبي-سازدى كەشتە اقىننىڭ ولەڭدەرى وقىلىپ، ەستەلىكتەر ايتىلدى. ونىڭ ءوزى 45 جاسىندا دۇنيەدەن وتسە دە، تۋىندىلارى، ارتىنان قالدىرعان وشپەس باي مۇراسى ۇلتقا قىزمەت ەتۋىن كۇنى بۇگىنگە دەيىن توقتاتقان جوق. «ەسىڭە مەنى العايسىڭ...» دەپ ايدار تاعىلعان شارادا دارا تۇلعا شىعارماشىلىعىنىڭ شىڭى مەن ەرەكشەلىكتەرى ءسوز بولىپ، وسكەلەڭ ۇرپاققا دارىپتەلدى. باقىت بەدەلحانۇلى، قازاقستان جازۋشىلار وداعى باسقارما توراعاسىنىڭ ورىنباسارى: - وسى شارالار كوپ بولعان سايىن جاستار دا وسىعان ۇيدى. مۇنداي شارالار جەر-جەرلەردە كوپ بولۋعا ءتيىس. جانە ءوز توپىراعىنان شىققانداردى عانا ناسيحاتتاۋ از. مىسالى، نەگە ماحامبەتتى جامبىل توپىراعى اسقاقتاتپاسقا. ابايدى. جامبىل توپىراعىنان شىققان ۇلىلاردى ەرتەڭ اتىراۋ دۇركىرەتىپ جاتسا، استانا دۇركىرەتىپ جاتسا، سولتۇستىك وڭىرلەر اسپانداتىپ جاتسا، وسىنىڭ ءبارى ۇلتتىق بىرلىك، ىنتىماق، ىمىرانىڭ ءبىر توتە جولى.

پىكىرلەر