قازاقستان رەسپۋبليكاسىن پرەزيدەنتتىگىنە كانديدات دانيا ەسپاەۆا «Astana TV» ارناسى جۋرناليستەرىنىڭ وتىنىشىمەن قيىن جاعدايعا دۋشار بولعان كوپبالالى انا اقبايان جالمۇرزاەۆامەن كەزدەستى.
اقبايان كۇيەۋى وتباسىن تاستاپ كەتكەننەن كەيىن، بالالارىن اسىراپ باعۋ ءۇشىن ءوز ناپاقاسىن تابۋعا كىرىسكەنىن ايتتى. سالىنىپ جاتقان دۇڭگىرشەكتىڭ يەسىنە سەنىپ، ساۋدا ورنىن جالعا الۋ ءۇشىن 700 مىڭ تەڭگەدەن اسا قارجىسىن تولەگەن. ونىڭ العاشقى 340 مىڭ تەڭگەسىن بانك كارتاسى ارقىلى تولەسە، قالعان ەكەۋىن قولما-قول بەرگەن. بىراق قۇرىلىس اياقتالعان سوڭ، دۇكەن يەسى «اقشاسىن تولەمەدىڭ» دەپ، ايەلدى تاۋارلارىمەن بىرگە كۇشتەپ شىعارىپ تاستاعان.
اقشاسى قالماعان انا جەكەمەنشىك جاتاقحاناداعى بولمەسىنىڭ اقىسىن تولەي الماعان. بۇعان جاتاقحانا يەسى (سىرىمبەت كوش.، 7) كەپىلدىككە ايەلى مەن مەن بالالارىنىڭ كيىمدەرى مەن زاتتارىن الىپ، بەيشارانى قۋىپ شىعارادى.
كىشكەنتاي 4 بالاسىمەن دالادا قالعان انا قولدان شاتىر قۇرادى. قازىر جاڭبىر مەن جەلگە قاراماستان سول جۇقا شاتىردىڭ ىشىندە تۇرۋعا ءماجبۇر بولىپ وتىر. العاشقى ءتۇنى-اق بالالارعا سۋىق ءتيىپ، اۋىرىپ قالعان. انا تىم بولماعاندا تومەن اقىداعى 10 مەتر جاتاقحانداعى بولمە بەرۋىن سۇراپ وتىر. كوپبالالى وتباسى اكىمدىكتە باسپانا الۋ كەزەگىندە تۇرعانىمەن، ونى جاقىن ارادا المايدى.
اقبايان اكىمدىككە دە، كەزەكشى ۋچاسكەلىك پوليتسيا قىزمەتكەرىنە دە ارىزىن ايتقانىمەن، ودان جاۋاپ الا العان جوق. دۇكەن يەسى اكىمدىكتە «ءوزىنىڭ ادامدارى» بار ەكەنىن ايتقان، بۇنى اكىمدىكتىڭ قوزعالىسسىز وتىرعانىنان دا كورۋگە بولادى.
اقباياننىڭ جانىندا ونى قولداۋعا كەلگەن تاعى ءبىر كوپبالالى انا بار – جانار بيدايبەكوۆا. 5 جىل بۇرىن ونىڭ 3 بالاسى وتتا ورتەنىپ قايتىس بولادى. بالالارىنىڭ مۇردەسىن كورگەن كۇيەۋىنىڭ جۇرەك تالماسى ۇستاپ، ول دا قايتىس بولادى. كەزىندەگى ۇلكەن ءبىر شاڭىراقتان 2 بالاسى مەن 4 قازاسى تۋرالى انىقتاما قالىپ وتىر. تراگدەيادان سوڭ اكىمدىك وعان جاتاقحانادان بولمە بەرگەن. ەندى جانار اقبايانعا كومەكتەسۋدى سۇراپ وتىر.
وسىعان بايلانىستى، دانيا ەسپاەۆا ەلىمىزدىڭ باس پروكۋرورى مەن نۇر-سۇلتان قالاسىنىڭ اكىمىنە رەسمي ساۋال جولداپ، كوپبالالى انالاردىڭ زاڭدى قۇقىقتارىن قورعاۋدى تالاپ ەتتى.
قوسىمشا: قر پرەزيدەنتتىگىنە ۇمىتكەر دانيا ەسپاەۆانىڭ قر باس پروكۋرورى مەن نۇر-سۇلتان قالاسىنىڭ اكىمىنە جىبەرگەن رەسمي حاتى.
«اق جول» پارتياسىنىڭ ءباسپاسوز قىزمەتى
قازاقستان رەسپۋبليكاسىنىڭ پرەزيدەنتتىگىنە ۇمىتكەر
د.م. ەسپاەۆانىڭ سايلاۋ قورىنىڭ قارجىسىنان تولەندى
