تالعار اۋدانىنداعى ساياجاي تۇرعىندارى ونداعان جىلدار بويى وركەنيەت يگىلىگىنەن وقشاۋ ءومىر ءسۇرىپ كەلەدى. ساياجاي ايماعىنىڭ اۋىل مارتەبەسى جوق، سول سەبەپتى سول اۋدان تۇرعىندارى گازداندىرۋ، جارىق، ءتىپتى اۋىز سۋمەن قامتۋ سىندى كوممۋنالدىق ماسەلەلەردى وزدەرى شەشۋگە ءماجبۇر، - دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
تۇرعىنداردىڭ ايتۋىنشا، ولاردىڭ ۇيلەرى گازداندىرىلماعان، كوممۋنالدىق تولەمدەردى توراعا دەگەندەرگە تولەپ، باعانى ايتارلىقتاي شارىقتاتىپ جىبەرەدى. مۇنىڭ بارلىعى، تۇرعىنداردىڭ ايتۋىنشا، قاراپايىم عانا سەبەپ: تالعار ساياجايلارىندا اۋىل مارتەبەسى جوق. ولار ساياجايلار كەڭدالا اۋىلىنىڭ قۇرامىنا ەنگەندە، ماسەلەلەرى شەشىلەدى دەپ سەنەدى.
«جارىق ءۇشىن ءبىز كيلوۆاتىنا 32 تەڭگەدەن 40 تەڭگەگە دەيىن تولەسەك، كورشىلەس تالعارلىقتار 24 تەڭگە تولەيدى. توراعالار شىعىندارعا بايلانىستى باعانىڭ شارىقتاپ كەتكەنىن العا تارتادى. ءبىز قانداي شىعىن تۋرالى ايتىپ وتىرعانىمىزدى تۇسىنبەيمىز. جارىقتى ءبىز ەڭبەكشىقازاق وڭىرىنەن الامىز. قوقىس ءۇشىن ايىنا 1200 تەڭگە تولەيمىز، سۋدىڭ تەكشە مەترى 100 تەڭگە. توراعاعا اقشا تولەيمىز، ءار ساياجايدىڭ ءوز توراعاسى بار. ارينە، ولار سومانىڭ ءبىر بولىگىن وزدەرىنە قالدىرادى. گازدى جەكە كومپانيالار ارقىلى جەتكىزەمىز. قازىر بۇل ءسان-سالتاناتتىڭ قۇنى پەش، قوسالقى بولشەكتەر جانە باسقا دا شىعىنداردى ەسەپتەمەگەندە شامامەن 450 مىڭ تەڭگەنى قۇرايدى»، - دەپ شاعىمداندى ساياجاي تۇرعىنى كلارا.
بۇعان دەيىن كەڭدالا اۋىلىنداعى 100-گە جۋىق وتباسى بيىلعى قىستا جىلۋسىز قالۋى مۇمكىن ەكەنى حابارلانعان بولاتىن. تۇرعىن ۇيلەرگە قۇبىر تارتۋ ءۇشىن اقشا تولەپ، ەسكى كومىر پەشتەرىن بۇزىپ تاستاعاندارىن ايتىپ، شەنەۋنىكتەردىڭ اۋىلعا گازبەن جىلىتۋ تارتىلادى دەگەن سوزىنە سەنگەن جۇرت. بىراق قانداي دا ءبىر سەبەپتەرمەن جوبا توقتاپ قالعان.
«ادىرنا» ۇلتتىق پورتالى
