زامانبەك نۇرقادىلوۆ - تاۋەلسىز قازاقستاننىڭ ەڭ ءىرى، ەڭ بيىك ساياسي تۇلعاسى. اۆتوريتارلى بيلىكپەن اشىق كۇرەس جۇرگىزگەن ناعىز جاۋجۇرەك، جاۋىنگەر ازامات. حالقى ءۇشىن قالتقىسىز ەڭبەك ەتكەن ۇلتىنىڭ ءبىرتۋار ۇلى.
ءوزىنىڭ تۋعان ەلىن، تۋعان ۇلتىن شەكسىز سۇيە بىلگەن، ءارى سول جولدا جانى قۇربان بولعان سۇيەگى اسىل ەر.
ز.نۇرقادىلوۆ تۋرالى جازىلعان ەڭبەكتەر مەن ەستەلىكتەر ول كىسىنىڭ جاعىمپازدىق پەن ەكىجۇزدىلىككە جانى قاس بولعان شىنشىل، قيىندىقتان قايمىقپايتىن، قاتەنى بەتكە ايتا بىلگەن تۋراشىل تۇلعا بولعانىن ايعاقتايدى.
الماتى قالاسى مەن الماتى وبلىسىنىڭ بۇرىنعى اكىمى، بۇرىنعى توتەنشە جاعدايلار جونىندەگى اگەنتتىك باسشىسى بولعان مارقۇم زامانبەك نۇرقادىلوۆ وسىدان 18 جىل بۇرىن، ءدال وسى قاراشانىڭ 12-ءى كۇنى الماتىداعى ۇيىندە جۇمباق جاعدايدا قازا تاپتى.
رەسمي تەرگەۋ نۇرقادىلوۆ ءوز-ءوزىن اتىپ قازا بولعان دەگەن قورىتىندى جاسادى. بىراق كوپشىلىك سول كەزدەگى ن.نازارباەۆ بيلىگىن سىناعان قايراتكەر قاستاندىقتىڭ قۇربانى بولعان دەپ ەسەپتەيدى.
اسىل كەزدىك قىن تۇبىندە جاتپايدى. جاڭا قازاقستاننىڭ قۇرىلعانى راس بولسا، ەلىن سۇيگەن ەردىڭ جۇمباق ءولىمىنىڭ شىندىعى اشىلۋى، ايتىلۋى ءتيىس. اقيقاتتىڭ اشىلۋ جولىندا ز.نۇرقادىلوۆپەن توننىڭ ىشكى باۋىنداي جاقىن ارالاسقان ادام - سول ۋاقىتتاعى وپپوزيتسيا وكىلى، قازىرگى ءماجىلىس دەپۋتاتى ەرمۇرات ءباپي تۇرۋى ءتيىس. بۇل ادامدىق بورىش، ار الدىنداعى امانات.
قازاعىمنىڭ ماڭدايىنا سىيماي كەتكەن ازامات ءار قازاقتىڭ جۇرەگىندە قايسارلىقتىڭ سيۆولى رەتىندە ماڭگى ساقتالماق. اسىل ەردىڭ ەسىمى ۇمىتىلمايدى.
