ەلوردادا «AMANAT» پارتياسىنىڭ قولداۋىمەن مادەنيەت جانە اقپارات مينيسترلىگى ۇيىمداستىرعان «التىن دومبىرا» رەسپۋبليكالىق اقىندار ايتىسى باستالدى. «ەڭبەك – ەل ىرىسى» تاقىرىبىنداعى ءداستۇرلى جىر الامانى بيىل قاراپايىم ەڭبەك ادامدارىنا ارنالىپ وتىر.
ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ مەملەكەت باسشىسى قاسىم-جومارت توقاەۆ ەڭبەك ادامىنىڭ مارتەبەسىن كوتەرۋدى ۇنەمى ايتىپ جۇرگەنىنە ەرەكشە نازار اۋدارىپ، رەسپۋبليكا كۇنى قارساڭىندا پرەزيدەنت 700-دەن استام قاراپايىم ەڭبەك ادامىن مەملەكەتتىك ناگرادامەن ماراپاتتاعانىن اتاپ ءوتتى. بۇل – ادال دا تاباندى ەڭبەگىمەن تاۋەلسىزدىگىمىزدىڭ تۇعىرىن بەكەمدەپ كەلە جاتقان ازاماتتارىمىزعا دەگەن قۇرمەت.
«بيىلعى «التىن دومبىرا» اقىندار ايتىسىنىڭ وزىندىك ءمانى بار. بۇگىنگى ايتىس قاراپايىم ەڭبەك ادامدارىنا ارنالادى. «ەڭبەك – ەل ىرىسى» دەپ وتىرمىز. سەبەبى، بەرەكەنىڭ باستاۋى – ەڭبەكتە. ال، ونىڭ يەسى دە، كيەسى دە – قاراپايىم ەڭبەك ادامدارى. وسى رەتتە مەملەكەت باسشىسى «ادال ازامات» ۇعىمىن قوعام ساناسىنا ءسىڭىرۋدى ۇسىندى. اينالىپ كەلگەندە، مەملەكەتتى مەملەكەت، ەلدى ەل قىلىپ وتىرعان باي-باعىلاندار ەمەس، قاتارداعى جۇمىسشىلار، مالشىلار، ديقاندار، ۇستازدار مەن دارىگەرلەر. قازىر ولارعا دەگەن قوعامنىڭ شىنايى قۇرمەتى ويانىپ كەلەدى»، – دەدى ە.قوشانوۆ.
ءوز كەزەگىندە، ايتىس تىزگىنىن ۇستاعان بەلگىلى اقىن، ءماجىلىس دەپۋتاتى امانجول ءالتاي كوزىقاراقتى كورەرمەنگە قازىلار القاسىنىڭ قۇرامىن جانە اقىندار قاۋىمىن تانىستىردى.
«ايتىس – ۇرپاقتان ۇرپاققا اكەنىڭ قانى، انانىڭ سۇتىمەن جەتكەن قاستەرلى ونەر. بۇگىن ەلوردا تورىندە ەڭبەك ادامىنىڭ قادىر-قاسيەتىن، ولاردىڭ قوعامداعى ايرىقشا ورنىن جىرعا قوسامىن دەپ ويى ورەلى، ءسوزى سۇبەلى ايتۋلى اقىندار باس قوسىپ وتىر. بارشاڭىزعا ساتتىلىك تىلەيمىن»، – دەدى ا.ءالتاي.
ايتا كەتەيىك، ەكى كۇنگە سوزىلاتىن الامان ايتىستا ەلىمىزدىڭ تۇكپىر-تۇكپىرىنەن جينالعان 16 اقىن ونەر كورسەتەدى. كىل جۇيرىك تە كىم جۇيرىك ەكەنى ەرتەڭ بەلگىلى بولماق.
