ۇبت قاجەت پە، جوق پا؟ ءبىلىم ءمينيسترى كوپتىڭ كوكەيىندەگى سۇراققا نۇكتە قويدى

 ۇلتتىق بىرىڭعاي تەستىلەۋ مەملەكەتتىك گرانتتاردى بولگەن كەزدە سىبايلاس جەمقورلىق تاۋەكەلدەرىن ازايتۋ ءۇشىن وتكىزىلەدى. بۇل تۋرالى ءبىلىم جانە عىلىم ءمينيسترى كۇلاش ءشامشيدينوۆا ايتتى، دەپ حابارلايدى Sputnik قازاقستان تىلشىسى.

"ۇلتتىق بىرىڭعاي تەستىلەۋ مەملەكەتتىك گرانتتاردى بولگەن كەزدە جەمقورلىق تاۋەكەلدەرىن ازايتۋ ءۇشىن وتكىزىلەدى. ءبىز تەستىلەۋ جۇيەسىن ودان ءارى جەتىلدىرۋ كەرەك دەپ ويلايمىز. قازىر ءبىلىم جۇيەسىندە ىستەيتىن قىزمەتكەرلەرمەن كونسۋلتاتسيالىق جۇمىستار ءجۇرىپ جاتىر. ءبىلىم جانە عىلىم مينيسترلىگى جوعارى وقۋ ورنىنا ءتۇسۋ جۇيەسىن جەتىلدىرۋدى كوزدەپ وتىر", - دەدى ءشامشيدينوۆا جۋرناليستەرگە.

مينيستر مەملەكەتىك گرانتتى ءبولۋ ماڭىزدى پروتسەسس ەكەنىن اتاپ ءوتتى.

"ويتكەنى ەلىمىزدىڭ بارلىق ازاماتى وسى گرانتقا ۇمىتتەنەدى. سوندىقتان مينيسترلىكتىڭ مىندەتى – بارىنشا اشىقتىقتى، ازاماتتاردىڭ تەڭ قۇقىعىن، ەڭ باستىسى، گرانتتى ءبولۋ كەزىندە ادىلدىكتى قامتاماسىز ەتۋ. سوندىقتان ءبىز مۇنى وسى پوزيتسيا تۇرعىسىنان قاراستىرامىز", - دەدى ۆەدومستۆو باسشىسى.

ايتا كەتسەك، ەلىمىزدە ۇبت 20 ماۋسىم مەن 5 شىلدە ارالىعىندا باستالادى. تالاپكەر بۇرىنعىداي ءۇش نەگىزگى ءپان – قازاقستان تاريحى، ماتەماتيكا جانە وقۋ ساۋاتتىلىعىن تاپسىرادى. بۇدان بولەك، ەكى سالالىق ءپان بار. ونى تالاپكەر ءوزى تاڭدايدى. بەس ءپان بويىنشا 120 تاپسىرما بەرىلەدى، الايدا ودان ءار تۇلەكتىڭ 140 ۇپاي جيناۋعا مۇمكىندىگى بار.