فرانتسيا پرەزيدەنتى ەممانۋەل ماكرون قازاقستان مەن وزبەكستانعا رەسمي ساپارى بارىسىندا رەسپۋبليكانىڭ اەس-تەرىن ۋرانمەن قامتاماسىز ەتۋ ماسەلەلەرىن تالقىلايدى، دەپ حابارلايدى "ادىرنا" ۇلتتىق پورتالى. بۇل تۋرالى Politico جازدى.
فرانتسيا پرەزيدەنتى ەممانۋەل ماكرون 1 قاراشادا قازاقستانعا، 2 قاراشادا وزبەكستانعا رەسمي ساپارمەن كەلەدى. «ساپار ورتالىق ازيانىڭ وسى ەكى ەلىمەن قارىم-قاتىناسىن تەرەڭدەتۋ اياسىندا وتەدى»، - دەپ اتاپ كورسەتتى ەليسەي سارايى. استانا مەن تاشكەنتتە ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىق پەن كولىكتى نىعايتۋ ماسەلەلەرى تالقىلانادى. دەگەنمەن، ۋران جەتكىزۋ بويىنشا كەلىسسوزدەر الدىڭعى قاتارعا شىعىپ وتىر.
فرانتسيا قازاقستان مەن وزبەكستاندى رەفورمالار مەن مودەرنيزاتسيالاۋ نەگىزىندە قولدايدى، سەرىكتەستىكتەردى ارتاراپتاندىرۋعا جاردەمدەسەدى، ولاردىڭ تاۋەلسىزدىگى مەن ەگەمەندىگىن قولدايدى، سونداي-اق ەۋروپامەن بايلانىستى نىعايتۋعا ۇمتىلادى، دەپ اتاپ ءوتتى پرەزيدەنت ماكرون اكىمشىلىگى.
«ءبىزدىڭ مىندەتىمىز - ءبىز بىلەتىن، سونداي-اق ەۋروپالىق وداق پەن امەريكاندىق سەرىكتەستەرىمىزبەن ۇزاق ۋاقىت بويى جۇمىس ىستەپ كەلە جاتقان وسى ايماقتا (ورتالىق ازيادا - ادىرنا) قارىم-قاتىناسىمىزدى دامىتۋ»، - دەپ كەلتىرەدى Agence-France-Press (AFP) ەليسەي سارايىنداعى مالىمەتتى نەگىزگە الىپ.
فرانس پرەسس اگەنتتىگى «ۋكرايناداعى قاقتىعىستار اياسىندا ورتالىق ازيا ەلدەرىنىڭ نەگىزگى ەكونوميكالىق جانە اسكەري سەرىكتەسى رەتىندە رەسەي فەدەراتسياسىنىڭ ايماقتاعى ىقپالى السىرەيدى» دەپ مالىمدەيدى. «ىقپال ءۇشىن جارىسقا» اقش پەن ەو-دان باسقا قىتاي مەن تۇركيا دا قاتىسۋدا، دەپ اتاپ كورسەتەدى فرانس پرەسس. وسىعان وراي فرانتسيا پرەزيدەنتى ورتالىق ازياعا ونەركاسىپ جانە سىرتقى ساۋدا مينيسترلەرىمەن بىرگە ساپار شەگۋدى ۇيعاردى، سونداي-اق فرانتسيانىڭ ءىرى ەنەرگەتيكالىق كومپانيالارى مەن ونەركاسىپتىك كاسىپورىندارىنىڭ باسشىلارى دا ساپاردا بىرگە جۇرەدى.
ەسكە سالا كەتەيىك، بۇگىن 1 قاراشا فرانتسيادا - كاتوليكتەردىڭ كۇللى اۋليە كۇنى اتاپ وتىلەدى. 15 تامىز جانە 1 قاڭتار سياقتى، 1 قاراشا دا فرانتسيانىڭ ەڭبەك كودەكسىندە كورسەتىلگەن ون ءبىر مەملەكەتتىك مەرەكەلەردىڭ ءبىرى بولىپ تابىلادى.
سونداي-اق، بۇل قاسىم-جومارت توقاەۆتىڭ شاقىرۋىمەن فرانتسيا پرەزيدەنتى ەممانۋەل ماكروننىڭ جاۋاپ ساپارى. قازاقستان پرەزيدەنتى وتكەن جىلدىڭ قاراشا ايىندا پاريجگە بارىپ، ماكرونمەن كەلىسسوزدەر جۇرگىزگەن بولاتىن. قازاقستانعا ساپارىنىڭ الدىندا فرانتسيا پرەزيدەنتى قاراعاندىداعى اپاتتان قازا تاپقاندارعا قازاق تىلىندە جازبا قالدىرىپ كوڭىل ايتتى.
