2023 جىلى 10 شىلدەدە مەملەكەت باسشىسى قاسىم-جومارت توقاەۆ «ونلاين-پلاتفورمالار جانە ونلاين-جارناما تۋرالى» قازاقستان رەسپۋبليكاسىنىڭ زاڭىنا قول قويدى. اتالعان زاڭداعى نەگىزگى قۇقىقتىق تەتىكتەردىڭ ءبىرى جەلىدەگى جارنامانى تاڭبالاۋ مىندەتىن ايدا بالاەۆا اتادى، دەپ حابارلايدى «ادىرنا» ۇلتتىق پورتالى.
«الەمنىڭ جەتەكشى ەلدەرى ونلاين جارنامانىڭ ماڭىزدى ءرولىن جانە ونى ينتەرنەتتە تاراتۋعا ەرەكشە ءمان بەرەدى. مىسالى، فرانتسيا، بەلگيا، ۇلىبريتانيا جانە يتاليا سياقتى بىرقاتار دامىعان ەلدەردە بلوگەرلەر قىزمەتى قۇقىقتىق اكتىلەرمەن رەتتەلەدى. بۇل ەرەجەلەر الەۋمەتتىك جەلىدەگى ماركەتينگ نارىعىندا اشىقتىق پەن ءادىل باسەكەنى قامتاماسىز ەتەدى. ال قازاقستاندا كوممەرتسيالىق ماتەريالدارعا جارناما دەگەن بەلگىنى قويۋ نەگىزگى تالاپتاردىڭ ءبىرى. اۋديتوريا تاراتىلىپ وتىرعان اقپاراتتىڭ اقىلى جازىلعانىن ءبىلۋى ءتيىس»، - دەيدى مينيستر.
سونىمەن قاتار تامىز ايىندا «ونلاين جارناما تاڭبالاۋ ەرەجەلەرىن» جاريالانعان بولاتىن. وندا جارنامالىق ماتەريالدارعا ارنايى بەلگى قويۋ مىندەتتەرى بار. سوعان سايكەس اقىلى ماتەريالدار مەملەكەتتىك نەمەسە ورىس تىلدەرىندە ۇسىنىلاتىن نۇسقالاردىڭ بىرىنە بەلگىلەنۋى قاجەت. مىسالى، جارناما –رەكلاما، جارنامالىق ماتەريال – رەكلامنىي ماتەريال، سەرىكتەستىك ماتەريال – پارتنەرسكي ماتەريال، دەمەۋشىلىك ماتەريال – سپونسورسكي ماتەريال، جارناما قۇقىعىندا – نا پراۆاح رەكلامى، دەمەۋشىمەن تولەنگەن – وپلاچەنو سپونسوروم، PR قۇقىعىندا – نا پراۆاح PR دەگەن بەلگىلەرى بولۋى قاجەت.
ايدا بالاەۆانىڭ سوزىنشە، ينتەرنەتتەگى جارنامانى تاڭبالاۋ الەمدىك تاجىريبە ءۇشىن عانا قولعا الىنباعان. بۇل الەۋمەتتىك جەلىدەگى نارىقتىق قاتىناستار مادەنيەتىن قالىپتاستىرۋ ءۇشىن قاجەت. سونداي-اق بۇل زاڭ بلوگەرلەرگە كاسىپكەرلىك كودەكسكە سايكەس اقىلى قىزمەت كورسەتۋ مىندەتتەرىن جۇكتەيدى. ياعني، ولار كاسىپكەر رەتىندە تىركەلىپ، سالىق تولەۋى ءتيىس.
«بۇگىندە قۇزىرەتتى ورگاندار ماركەتينگتىك قىزمەت كورسەتەتىن بلوگەرلەردىڭ ستاتۋسىن انىقتاۋمەن اينالىسۋدا. وسى كاسىپ تۇرىمەن پايدا تاۋىپ جۇرگەن ازاماتتار ءتيىستى مەكەمەلەرگە تىركەلمەگەن جاعدايدا، زاڭسىز كاسىپكەرلىك قىزمەتى ءۇشىن جاۋاپكەرشىلىك بار ەكەنىن ەسكە سالامىن. ءبىرىنشى كەزەڭگە مەملەكەتتىك كىرىستەر كوميتەتى ءىرى بلوگەرلەرگە تاۋەلسىز مونيتورينگ جۇرگىزىپ، ونىڭ نەگىزىنە باقىلاۋ جۇرگىزدى. الداعى ۋاقىتتا ءبىزدىڭ ۆەدومستۆو مەن سالىق ورگانى اراسىندا بىرلەسكەن جۇمىستار ۇيىمداستىرىلادى. سونىمەن قاتار بلوگەرلەر وزدەرىنىڭ جارناما بەرۋشىلەرىنە مۇقيات بولۋى كەرەك. ويتكەنى، الەۋمەتتىك جەلىلەردەگى ءار اقپارات ءۇشىن جارناما جاساۋشى تولىق جاۋاپكەرشىلىكتە بولادى» - دەپ اتاپ ءوتتى ا.بالاەۆا.
زاڭعا سايكەس، ەندى قارجى پيراميدالارىن جارناما جاساعاندارعا 2 اەك مولشەرىندە ايىپپۇل، 600 ساعاتقا دەيىن قوعامدىق جۇمىستارعا تارتۋ نەمەسە 2 جىلعا دەيىن باس بوستاندىعىنان ايىرۋ جازاسى تاعايىندالادى. قىلمىستىڭ اۋىرلىعىنا قاراي مۇلكى تاركىلەنىپ، 3-7 جىلعا دەيىن باس بوستاندىعىنان ايىرۋ دا قاراستىرىلعان. ودان باسقا ەلىمىزدە تەكسەرىلمەگەن اقپاراتتى تاراتقان الەۋمەتتىك جەلى قولدانۋشىلارىنا دا جازا قاراستىرىلعان. قۇقىق بۇزۋشىلىقتىڭ اۋىرلىعىنا قاراي الەۋمەتتىك جەلىنى پايدالانۋشىلار دا اكىمشىلىك جاۋاپكەرشىلىككە تارتىلادى. ەگەر قۇقىق بۇزۋشىلىق ءبىر جىلدىڭ ىشىندە قايتالانسا، 10 كۇندىك اكىمشىلىك قاماۋعا الىنادى نەمەسە قىلمىستىق جاۋاپكەرشىلىككە تارتىلادى.
«ادىرنا» ۇلتتىق پورتالى
