ارمەنيادان ارمياندار كوشىپ جاتىر. بۇگىنگى كۇنى ارمەنيا حالقى ازايىپ كەلەدى. ارمەنيا ۇلكەن قاتەلىك جاسادى، ولار قاراباقتى ءازىربايجاننان تارتىپ الدى. ەندى ءازىربايجاننان تارتىپ العان قاراباقتى قورعاۋ كەرەك، ياعني ازىربايجانمەن سوعىسۋ كەرەك. ال سوعىس قىمبات، ارميان حالقى سوعىستان شارشاپ، بالالارىن اسكەرگە جىبەرگىسى كەلمەيدى. ەگەردە، ارمەنيادا حالىق سانى ءۇش ميلليوننان ازايسا، ءازىربايجاندا حالىق سانى توعىز ميلليوننان استى. ءازىربايجان بيۋدجەتى مۇناي قارجىسىمەن تولىعىپ كەلەدى. ال ارمەنيا كەن بايلىعىنا كەدەي، ارمەنيا ءۇش جاعىنان «جاۋلارىمەن قورشالىپ» ساۋدا جاساۋعا مۇمكىندىگى جوق. شەت ەلدىك ارمياندار فينانستىق كومەك كورسەتىپ كەلەدى، بىراق كومەك جەتكىلىكسىز. ۇلى دەرجاۆالار ارمەنيانىڭ اگرەسسيۆتىك ساياساتىن قولدامايدى.
ال، قازاقستاننىڭ ىشكى جانە سىرتقى ساياساتى بەيبىت. قازاقستان رەسەيدىڭ قاس قاباعىنا قاراپ 18% قانا قۇرايتىن ورىس جۇرتشىلىعىنىڭ ءتىلىن رەسمي ءتىل رەتىندە پايدالانىپ، سول تىلگە باسىمدىلىق بەرىپ وتىر. قازاقستان قىتايدىڭ قاس قاباعىنا قاراپ سول ەلدەگى قازاق بالاسىن قورعاي الماي كەلەدى. قىتاي قازاقستانداعى كەرەمەتتەي «جىبەك جولى» اتالىپ كەتكەن تەمىر جولىمىزدى پايدالانىپ وتىرسا دا، شىڭجانداعى قازاقتى «تەرروريست» دەپ ايىپتاپ، ولاردى اتامەكەنگە جىبەرمەي وتىر. ءبىزدىڭ بيلىك سۋىق قاندىلىق ساقتاپ كەلەدى. الەمدەگى ەڭ قۋاتتى مەملەكەتپەن اراقاتىناستى بۇزعىسى جوق. بۇل ساياسات دۇرىس تا شىعار، بىراق قايران قازەكەڭە وبال بولدى. حالىق سانى دەمەكشى. قازاقستان حالقى ءوسىپ كەلەدى. جىلما جىل 250-260 مىڭعا قازاق ءوسىپ كەلەدى. بۇل قارقىن ساقتالسا كەلەسى ون جىلدا تاعى 2.5 ميلليون ادام قوسىلىپ، رەسپۋبليكاداعى قازاقتىڭ سانىن 15 -16 ميلليونعا جەتكىزەمىز. ەلىمىزدەگى ورىس پەن نەمىس سانى ازايىپ كەلەدى. ولاردىڭ بىزگە وكپەسى جوق كورىنەدى. بىزگە بىرەۋدىڭ جەرى كەرەك ەمەس. ءبىزدىڭ ساياسات سەن تيمەسەڭ مەن تيمەيمىن اتتى ساياسات. ۇلى جانە اگرەسسيۆتى دەرجاۆالاردىڭ اراسىنداعى قازاقستانعا وسى ساياسات پراگماتيكالىق جاعىنان ءتيىمدى.
ءازىمباي عالي
