پرەمەر-مينيستر ءاليحان سمايىلوۆ ۇكىمەتتىك دەڭگەيدەگى بىرقاتار ءىرى ءىس-شارالارعا قاتىسۋ ءۇشىن بىشكەك قالاسىنا (قىرعىزستان) جۇمىس ساپارىمەن باردى، دەپ حابارلايدى "ادىرنا" پورتالى.
وسىلايشا، شىۇ-عا مۇشە مەملەكەتتەردىڭ ۇكىمەت باسشىلارى كەڭەسىنىڭ وتىرىسىندا شانحاي ىنتىماقتاستىق ۇيىمى كەڭىستىگىندە ساۋدا-ەكونوميكالىق جانە مادەني-گۋمانيتارلىق سالالارداعى ءوزارا ءىس-قيمىلدى كۇشەيتۋ شارالارى تالقىلانادى.
تمد ەلدەرىنىڭ ۇكىمەت باسشىلارى كەڭەسى مەن ەۋرازيالىق ۇكىمەتارالىق كەڭەس اياسىندا ىنتىماقتاستىقتىڭ كەڭ اۋقىمدى ماسەلەلەرىن تالقىلاۋ جوسپارلانۋدا. ولاردىڭ قاتارىندا گەودەزيا جانە كارتوگرافيا سالاسىنداعى ءوزارا ءىس-قيمىل، تاۋارلاردى سەرتيفيكاتتاۋ جانە كەدەندىك دەكلاراتسيالاۋ، ءتۇرلى سالالاردا كووپەراتسيا جوبالارىن جۇزەگە اسىرۋ، ەنەرگەتيكا جانە اۋىل شارۋاشىلىعى سالالارىندا بىرلەسكەن قادامدار بار.
