ۋكراينا پرەزيدەنتى ۆلاديمير زەلەنسكي "ۋكراينا اۋماعىنىڭ تۇتاستىعىن قالىپقا كەلتىرۋ ىسىندە كوشباسشىلىق تانىتىپ، ەل ءىشىن رەفورمالاۋدا كومەكتەسكەنى ءۇشىن" ۆاشينگتونعا العىس ايتتى. جاڭا پرەزيدەنتتى ۇلىقتاۋ راسىمىنە قاتىسۋعا كەلگەن اقش وكىلدەرىمەن وتكەن كەزدەسۋدە زەلەنسكي "اقش - ۋكراينانىڭ رەسەي اگرەسسياسىنا قارسى تۇرۋدا قۋاتتى ءارى ءىرى سەرىكتەستەرىنىڭ ءبىرى" دەدى. بۇل تۋرالى ۋكراينا پرەزيدەنتىنىڭ سايتى حابارلادى.
"دونباسس پەن قىرىمداعى رەسەي اگرەسسياسىنا ءوزىمىز قارسى تۇرا المايمىز. سوندىقتان سىزدەردىڭ كومەكتەرىڭىز كەرەك. اقش-تىڭ رەسەيگە قارسى سانكتسياسىن كۇشەيتۋدى جالعاستىرعاندارىڭىزدى قالايمىز" دەدى زەلەنسكي. ول اقش-قا قاۋىپسىزدىك سالاسىندا كورسەتكەن كومەگى ءۇشىن العىس ايتتى.
پرەزيدەنت ۋكراينادا اشىق، ءادىل ءارى دەموكراتيالىق رەفورما جۇرگىزۋگە ءازىر ەكەنىن ايتقان. ول اقش-تى ۋكرايناعا ۇلگى دەپ اتادى.
تاپ وسى كۇن - 20 مامىردا زەلەنسكي ەۋروپا كوميسسياسى توراعاسىنىڭ ورىنباسارى ماروش شەفچوۆيچپەن كەزدەسكەن. بۇل كەزدەسۋدە دە پرەزيدەنت ەۋروپا وداعىنىڭ رەسەيگە سانكتسيا ارقىلى قىسىم كورسەتۋى جالعاسادى دەپ ۇمىتتەنەتىنىن ايتقان. "بۇل رەسەيدىڭ دونباسستاعى ارەكەتتەرىنىڭ زاردابىن تارتىپ وتىرعان ۋكراينا ءۇشىن وتە ماڭىزدى" دەدى زەلەنسكي.
"ازاتتىق" راديوسى
