تۋريستىك پوليتسيا قىتاي تىلىندە سويلەيدى

2455
Adyrna.kz Telegram

الماتى وبلىسىندا تۋريستىك پوليتسيا ەندى قىتاي تىلىندە قىزمەت كورسەتەدى. ولار مەملەكەتتىك تىلدەن بولەك، اعىلشىن، ورىس تىلدەرىن دە ءبىلۋ كەرەك. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلايدى.

وبلىستىڭ قىتايمەن شەكارالاساتىنىن ەسكەرە وتىرىپ، بولىمشەدە قىتاي ءتىلىن ەركىن مەڭگەرگەن قىزمەتكەرلەر جۇمىس جاسايتىن بولادى. مالىمەتكە قاراعاندا، جاڭادان قۇرىلعان پوليتسيا بولىمشەسىندەگى وفيتسەرلىك قۇرامنىڭ شتاتتىق سانى 5 بىرلىكتەن تۇرادى.

«تۋريستىك پوليتسيا قۇرامىنا ەنگەن قىزمەتكەرلەر مۇقيات ىرىكتەۋدەن ءوتتى، زاڭنامانى جانە شەت تىلدەرىن جاقسى مەڭگەرگەن. ولار ەلىمىزدىڭ تاريحىن دا جاقسى بىلەدى، اڭگىمەشىل، اشىق. ارقايسىسى مەملەكەتتىك تىلدەن بولەك، اعىلشىن جانە ورىس تىلدەرىن جاقسى مەڭگەرگەن. سونىمەن قاتار، ءوڭىرىمىز قىتاي حالىق رەسپۋبليكاسىمەن شەكتەسەتىنىن ەسكەرە وتىرىپ، بولىمشەنىڭ ءبىر قىزمەتكەرى قىتاي ءتىلىن ەركىن مەڭگەرگەن»، - دەلىنگەن ءباسپاسوز بايانىندا.

قازىرگى تاڭدا تۋريستىك پوليتسيا ەلىمىزدىڭ بەس وڭىرىندە قىزمەت ەتەدى. ولاردىڭ مىندەتى تۋريستەردى قىزىقتىراتىن ماسەلەلەرگە جاۋاپ بەرىپ، ولاردىڭ قاۋىپسىزدىگىن قامتامسىز ەتۋ.

«تۋريستىك پوليتسيا الاكول اۋدانىندا ارنايى اقپاراتتىق جۇيەلەرى، تەحنيكالار مەن بايلانىس قۇرالدارى بار ستانتسيونارلىق بەكەتتە جۇمىس ىستەي باستادى. الاكول سوڭعى جىلدارى شەتەلدىكتەر كوپ كەلەتىن ورىنعا اينالدى»، - دەدى ءباسپاسوز قىزمەتى.

پىكىرلەر