اقش قىتايلىق HUAWEI كومپانياسىنىڭ الەمدەگى 70 فيليالىن سانكتسيانىڭ قارا تىزىمىنە كىرگىزدى.
وسى سانكتسيالارعا بايلانىستى اقش پرەزيدەنتى دونالد ترامپتىڭ ۇكىمى كۇشىنە ەندى. وسىدان ءبىراز ۋاقىت بۇرىن اتاقتى HUAWEI-ءدىڭ ديرەكتورلار كەڭەسىنىڭ توراعاسى مەن ۆانچجوۋ كانادادا ۇستالىپ، اقش-قا ەكستراداتسيالانعان بولاتىن. بۇگىن امەريكا ساۋدا مينيسترلىگى كومپانيانىڭ الەمدەگى 70 فيليالى سانكتسيانىڭ قارا تىزىمىنە كىرگەنىن حابارلادى. بۇل جايىندا Reuters ارنايى اقپاراتتار تاراتتى.
قۇراما شتاتتار ۇكىمەتى ەلدەگى گيگانت تەلەكاممۋنيكاتسيالىق كومپانيالاردىڭ بارىنە HUAWEI كومپانياسىنىڭ ونىمدەرىنەن باس تارتۋعا شاقىردى. ونى اقش ۇكىمەتى ارنايى ماقۇلداۋلارمەن دە بەكىتىپ تاستادى. دونالد ترامپ 15 مامىر كۇنى ارنايى ۇكىمگە قول قويدى. وسىدان ءبىراز ۋاقىت بۇرىن اتالعان كومپانيانىڭ جۇرگىزىپ وتىرعان سىرتقى ساۋدا ساياساتى حالىقارالىق نورمالارعا ساي بولماعاندىقتان، اقش تاراپى قاتاڭ ەسكەرتۋلەر جاساپ تا كەلگەن. سوڭىنان سانكتسيانىڭ قىسپاعىنا العان. امەريكانىڭ فەدەرالدى تەرگەۋ ورگاندارى كومپانيانىڭ ىشكى قۇپيا قىزمەتىنەن اقش-تىڭ ۇلتتىق قاۋىپسىزدىگىنە قاۋىپ توندىرەتىن ايعاقتاردى انىقتاعان.
ءدال قازىرگى ۋاقىتتا كومپانيانىڭ باسشىسى مەن ۆانچجوۋگە 25 پۋنكت بويىنشا ايىپ تاعىلىپ وتىر. اقش ۇكىمەتى HUAWEI كومپانياسىنىڭ ونىمدەرىن تۇتىناتىن ەلدەردىڭ بارىنە دە ەسكەرتۋ جاساپ، سانكتسيا جاريالاناتىنىن ءبىراز ۋاقىت بۇرىن-اق مالىمدەپ قويعان ەدى. دونالد ترامپ ونى وسى جولى تاعى دا قايتالاپ ايتىپ ءوتتى. قىتاي تاعى دا شاش ەتەكتەن شىعىنعا ۇشىراۋى مۇمكىن.
بەكبولات قارجان
