قازاقستاننىڭ مەملەكەتتىك مەكتەپتەرىندەگى بالالاردىڭ 64,2 پايىزى – فۋنكتسيونالدىق ساۋاتسىز، - دەپتى دۇنيەجۇزىلىك بانكتىڭ ساراپشىلارى. ءسىز بۇنىمەن كەلىسەسىز بە؟
جاعدايىمىز شىنىمەن وسىنداي ناشار ما؟ - دەپتى ءبىر جۋرناليست دوس.
- ءيا، كەلىسەمىن. ودان دا اۋىر بولۋى مۇمكىن دەسەم، ءما، شىنىمەن بە؟ نەگە؟- دەيدى. سەبەبىن تالداپ كورەيىك.
- بىرىنشىدەن، جالعان ەسەپ، وتىرىك پايىز قۋ. ءۇش جىلعا جۋىق مەكتەپ ديرەكتورى بولعاندا №90 گيمنازيادا ءبىلىم ساپاسىنا قاتتى ءمان بەردىك. بىراق كۇندەلىك.كز-تەگى ءبىلىم ساپاسى بويىنشا استاناداعى مەكتەپتەردىڭ ىشىندە ەڭ تومەن ساپانى كورسەتتىك. نەگە؟ سەبەبى مۇعالىمدەردى پايىز قۋعىزىپ، ءبىر ساباقتان ءۇش، ءبىر ساباقتان ءتورت العاندار بولماسىن دەپ وتىرىك ساپا جاساتپادىق، قاتاڭ تۇردە ءادىل باعالاۋعا تىرىستىق. ەكى دەگەن باعاعا دا رۇقسات بەردىك.
ەسەسىنە ءبىلىم باسقارماسىنىڭ تالاي جينالىسىندا تاياق جەدىك. سول كەزدە مەكتەپتەردىڭ كورسەتەتىن پايىزىنا تاڭ قالاتىنمىن. سەبەبى ءبىراز مەكتەپتىڭ التىن بەلگىسى مەن ۇزدىگى QAZBILIM-گە ۇبت-عا دايىندىققا كەلگەندە مىناۋ قالاي ۇزدىك وقۋشى دەيتىنمىن.
كەيىن ءبىراز مەكتەپتىڭ قاعازداعى ءبىلىم ساپاسىن كورگەندە، پايىزدىق جارىسىن كورگەندە جاعامدى ۇستادىم دا قويدىم. ال سول مەكتەپتەرگە سىرتتاي تاۋەلسىز باعالاۋ جۇرگىزسەڭ، وتىن بولارى انىق ەدى. وكىنىشكە قاراي، بۇل اۋرۋ بۇكىل وڭىردە بار.
بارىندە سوتسياليستىك جارىس. بۇل قولدان جاسالعان وتىرىك ساپالار تۇبىمىزگە جەتەدى.
سەبەبى ەڭ اۋىرى - بالام 4-5-كە وقىپ جاتىر دەپ اتا-انا الدانادى.
- ەكىنشىدەن، 2-3 اۋىسىمدى مەكتەپتەر، سىيىمدىلىعىعان الدەنەشە ەسە ارتىق وتىرعان مەكتەپتەر مەملەكەتتىك ستاندارتتى دا تولىق ورىنداۋى قيىن. سول ءۇشىن وقۋشىلار جاپپاي قوسىمشا ساباققا جۇگىنەدى. ال اقىلى قوسىمشا بىلىمگە بىرەۋدىڭ شاماسى كەلسە، بىرەۋدىڭ شاماسى كەلمەيدى...
- ۇشىنشىدەن، ساپالى بىلىمگە تۇرتكى بولاتىنداردىڭ ساپاسى. وقۋلىق ساپاسى، باعدارلاما ساپاسى، كادر ساپاسى. بىزدە بۇل ساپالار اۋىر. ءبىلىم ساپاسى قاشان دا مۇعالىم ساپاسىنان بيىك بولمايدى. ءبىلىم ساپاسى باعدارلاما، وقۋلىق، ادىستەمە ساپاسىنان بيىك بولمايدى.
وكىنىشكە قاراي، بىزدە بۇلار دا شىنايى ساپادان گورى جالعان رەيتينگ پەن بىتپەس قاعازداعى كەرەكسىز كورسەتكىشكە بەيىمدەلگەن.
ءبىز بارلىق سالادا جاۋىردى جابا توقىپ كەلە جاتىرمىز. ءبىز بارلىق سالادا وتىرىككە باتىپ قالدىق. سوندىقتان دۇنيەجۇزىلىك بانكتىڭ 64,2%-ىنا تاڭعالامىز. ايتپەسە، الەمدەگى ەڭ قاراپايىم ەمتيحان قاتارىنا كىرەتىن ۇبت-دا 140 بالدان 50 بالل دەگەن شەكتىك بالدى (نەگىزى 50 بالل شەكتىك دەگەن ۇيات 35%-ى جالپى بالدىڭ) 2022 جىلى 33% وقۋشى، 2023 جىلى 17% جيناي المادى. ال 11-سىنىپ وقۋشىلارى جاپپاي قوسىمشاعا باراتىنىن ەسكەرسەك، شىنايى ءبىلىم ساپاسىنىڭ قانشا ەكەنىن ەلەستەتۋگە بولادى.
تورتىنشىدەن، مەملەكەتتە ەشقانداي ادىلەتتى سىرتتاي باقىلاۋ جوق. بار سىرتتاي باقىلاۋلاردىڭ ءوزىن ويىنشىق جاسايدى. بىرەۋ ءبىلىپ تۇرىپ الدايدى، بىرەۋ الدانعانىن ءبىلىپ تۇرىپ الدانادى. ەكەۋى دە ءبىر-بىرىنە قاراپ قويىپ، ءبىلىم ساپاسى دۇرىس دەپ وتىرادى.
مەملەكەتتىك ەمتيحاننىڭ ءوزىن ادال، تازا وتكىزەتىن قاۋىم نەكەن-ساياق. مەملەكەتتىك ەمتيحان، سىرتتاي باقىلاۋ بولادى دەسە، وقۋشىلار اپايلار كومەكتەسەتىن ەمتيحان دەپ سەنەدى.
جالپى، بىزدە شىنايى ءبىلىم ساپاسى تۋرالى ويلاناتىندار وتە از. ءبارى تىنىش بولسىن، ەشكىم شۋلاماسىن دەگەنمەن ءومىر سۇرەدى. وكىنىشكە...
وسىدان شىعادى دا، قوعامدى بىلىكسىزدىك جايلايدى...
قۇزىرلى ورگاندارعا ۇناماسام دا، شىندىق وسى. تاعى ءبىراز نارسە ايتۋعا بولار ەدى، وعان ءتىلىمدى وسى جەردەن تىستەي سالايىن.
