استانادا ءوتىپ جاتقان VI Nobel Fest حالىقارالىق فەستيۆالى اياسىندا قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ الەمگە ايگىلى اۆتو-ديزاينەر فرەنك ستيۆەنسونعا «الامان بايگە» كارتيناسىن سىيعا تارتتى، دەپ حابارلايدى «ادىرنا» ۇلتتىق پورتالى.
كارتينا اۆتورى – وتاندىق سۋرەتشى ەرلان ايتۋاروۆ.
يسلامبەك سالجانوۆتىڭ سوزىنشە، سىيلىق كەزدەيسوق تاڭدالماعان.
«5 مىڭ جىل بۇرىن اتا-بابامىز، ياعني كوشپەندى جىلقى جانۋارىن ءبىرىنشى بولىپ ەرتتەپ ءمىنىپ، بۇكىل ادامزات وركەنيەتىندە سەرپىلىس جاسادى. مىنە، وسى ساتتەن باستاپ جىلقى ەڭ جىلدام ءارى نەگىزگى كولىك قۇرالىنا اينالدى. بۇل – تاريحتىڭ باعىتىن وزگەرتتى. جىلقىنى العاش قولعا ۇيرەتكەن – قازاق دالاسى. ءسىز ديزاينىن جاساعان Ferrari كولىگىندە ات بەينەلەنگەن ەمبلەما بار. سىزگە تارتۋ ەتكەن كارتينادا الامان بايگە بەينەلەنگەن. ول – قازاقتىڭ ۇلتتىق ات جارىسى. بىرنەشە مارتە چەمپيون بولعان فورمۋلا-1 سياقتى تەمىر تۇلپار جارىسىنىڭ باستاۋىندا وسى الامان بايگە تۇر دەپ ايتۋعا بولادى. ءسىزدى 2024 جىلى قىركۇيەكتە استانادا وتەتىن V دۇنيەجۇزىلىك كوشپەندىلەر ويىندارىنا شاقىرامىن»، - دەپ تۇيىندەدى ءسوزىن يسلامبەك سالجانوۆ.
ال وزىنە سىيلانعان سىيلىقتى فرەنك ستيۆەنسون جوعارى باعالايتىنىن، زاماناۋي شىعارماشىلىقتى شابىتتاندىرۋدا تاريحتىڭ ماڭىزدى ەكەنىن ايتتى. ديزاينەر يسلامبەك سالجانوۆقا ونەر تۋىندىسى مەن V دۇنيەجۇزىلىك كوشپەندىلەر ويىندارىنا شاقىرعانى ءۇشىن العىسىن ءبىلدىردى.
ايتا كەتسەك، يسلامبەك سالجانوۆ – قازاقستاندىق كاسىپكەر، مەتسەنات، قازاقستان ۇلتتىق سپورت قاۋىمداستىعىنىڭ پرەزيدەنتى. ال فرەنك ستيۆەنسون – Ferrari F430, Ford RS Cosworth, BMW X5, جاڭا MINI, Maserati MC12, Fiat 500, McLaren اۆتوموبيلدەرىنىڭ الەمگە ايگىلى ديزاينەرى.
«ادىرنا» ۇلتتىق پورتالى
