ۇستازدارعا قىسىم جاساۋدى توقتاتۋ كەرەك. بۇل تۋرالى پرەزيدەنت قاسىم-جومارت توقاەۆ رەسپۋبليكالىق پەداگوگتەر سەزىندە ايتتى، دەپ حابارلايدى “ادىرنا” ۇلتتىق پورتالى.
جوعارى كۋرس ستۋدەنتتەرىنىڭ پەداگوگيكالىق تاجىريبەسىنە ايرىقشا ءمان بەرىلەدى. بولاشاق مۇعالىمدەر ناقتى ءبىلىم بەرۋ ۇدەرىسىنە بارىنشا تەرەڭ بويلاۋ ءۇشىن جوعارى وقۋ ورىندارى مەكتەپتەرمەن تىعىز قارىم-قاتىناستا جۇمىس ىستەۋى قاجەت، - دەدى مەملەكەت باسشىسى.
سونىمەن قاتار، ول پەداگوگتەردىڭ بىلىكتىلىگىن باعالاۋ جانە ارتتىرۋ جۇيەسىن جاڭعىرتۋ قاجەت ەكەنىن ايتتى.
جىل سايىن ەلىمىزدە ماگيستر دارەجەسىن العان بىلىكتىلىگى جوعارى پەداگوگتەردىڭ قاتارى ارتىپ كەلەدى. قازىر تاڭدا ولاردىڭ سانى 21 مىڭنان استى. ولار – ءبىلىم بەرۋ ىسىنە وزىق ادىستەردى ەنگىزە الاتىن كاسىبي ماماندار. جاڭا تيپتەگى ءبىلىم بەرۋ ۇيىمدارىنىڭ بولاشاق باسشىلارىنىڭ نەگىزگى قۇرامى وسىنداي مامانداردان جاساقتالادى. جالپى، پەداگوگتەردىڭ بىلىكتىلىگىن باعالاۋ جانە ارتتىرۋ جۇيەسىن جاڭعىرتۋ قاجەت، - دەدى ول.
توقاەۆ بىلىكتىلىك تالاپتارىن ءجيى وزگەرتۋ ارقىلى وقىتۋشىلارعا قىسىم جاساۋدى توقتاتۋى كەرەكتىگىن ايتىپ ءوتتى.
سونىمەن قاتار سالالىق مينيسترلىك بىلىكتىلىك تالاپتارىن ءجيى وزگەرتۋ ارقىلى وقىتۋشىلارعا قىسىم جاساۋدى توقتاتۋى كەرەك ەكەنىن ايتقىم كەلەدى. ويىنا نە كەلسە، سونى ىستەيتىن شەنەۋنىكتەردىڭ جۇگەنسىزدىگىنە توسقاۋىل قويۋ قاجەت. مۇعالىمدەر تىنىش، تۇراقتى جانە الاڭسىز جۇمىس ىستەۋگە قۇقىلى. پەداگوگ كادرلاردىڭ 60 پايىزعا جۋىعى وڭىرلىك جوعارى وقۋ ورىندارىندا دايارلانادى. سوندىقتان وڭىرلەر دەڭگەيىندە جاس مۇعالىمدەردى قولداۋدىڭ ماڭىزى زور. اكىمدەر پەداگوگتەردى دايارلاۋ جانە جۇمىسقا ورنالاستىرۋ ءۇشىن قولايلى جاعداي جاساۋى كەرەك، - دەدى پرەزيدەنت.
