تۇرىكمەنستان پرەزيدەنتى سەردار بەردىمۇحامەدوۆكە رەسپۋبليكا باتىرى اتاعى بەرىلدى جانە «التىن اي» توسبەلگىسى تابىس ەتىلدى، دەپ جازادى "ادىرنا".
بەردىمۇحامەدوۆ بۇل مارتەبەلى اتاقتى تۇركىمەنستان تاۋەلسىزدىگىنىڭ 32 جىلدىعىنا بايلانىستى العانى اتاپ ءوتىلدى.
پارلامەنت قاۋلىسىندا كورسەتىلگەن سەبەپتەردىڭ قاتارىندا:
ەلدىڭ ۇلتتىق تاۋەلسىزدىگى مەن بەيتاراپتىق قاعيداتتارىن نىعايتۋعا قوسقان ۇلكەن جەكە ۇلەسى;
«جاڭا باستامالار كوتەرۋ ارقىلى دەموكراتيالىق، قۇقىقتىق جانە زايىرلى مەملەكەتتىڭ سەرپىندى دامۋىنداعى مەملەكەت پەن قوعامعا ايرىقشا قىزمەت ەتۋ;
ەل دامۋىنىڭ جاڭا كەزەڭىندە ساياسي جانە الەۋمەتتىك-ەكونوميكالىق قايتا قۇرۋلاردى جەتىلدىرۋ;
اتا-بابامىزدان قالعان قاعيدالارعا سايكەس اعا ۇرپاققا قۇرمەت كورسەتۋ، جاستاردى وتانعا دەگەن سۇيىسپەنشىلىك پەن ادالدىق رۋحىندا تاربيەلەۋ، تۇركىمەنستاننىڭ حالىقارالىق بەدەلىن نىعايتۋ;
"ارقاداع" نەگىزىن قالاعان مەملەكەتتىلىكتىڭ مىزعىماس تىرەگىن نىعايتۋداعى ەڭبەگى;
گۋندوگاردىڭ ايتۋىنشا، 42 جاستاعى سەردار بەردىمۇحامەدوۆ رەسپۋبليكاداعى ەڭ جوعارى دارەجەلى سىيلىقتىڭ يەگەرى اتاندى. ونىڭ الدىندا بۇل اتاقتى 55 جاسىندا العان رەسەيلىك عارىشكەر ولەگ كونونەنكو بولاتىن.
تۇركىمەنستان حالىق ماسلاحاتى (حالىق كەڭەسى) توراعاسى، ەلدىڭ بۇرىنعى پرەزيدەنتى جانە تۇركىمەن حالقىنىڭ ۇلتتىق كوشباسشىسى، "ارقاداع" (قولداۋشى، سۇيەنىش) تيتۋلىنا يە گۋربانگۋلى بەردىمۇحامەدوۆ ورتالىق ازيا مەملەكەتتەرى باسشىلارىنىڭ قۇرمەت بەلگىسىمەن ماراپاتتالعان بولاتىن.
ۇقساس جاڭالىقتار
