شىمكەنت قالاسىنىڭ قىلمىستىق سوتى Kausar travel تۋريستىك فيرماسىنىڭ ديرەكتورى مەدەت مۇراتبايۇلىنا قاتىستى ۇكىم شىعاردى، ول جۇزدەگەن قازاقستاندىقتاردى قاجىلىققا جولداما ۋادە ەتىپ الدادى، دەپ حابارلايدى "ادىرنا" ۇلتتىق پورتالى سوت زالىنان اقپارات تاراتقان Orda.kz-كە سىلتەمە كورسەتە وتىرىپ.
سوت تالقىلاۋى بارىسىندا تۋرفيرما ديرەكتورى ءوز كىناسىن مويىنداۋدان باس تارتتى. ونىڭ ايتۋىنشا، بۇل ىسكە بۇرىنعى دەپۋتات بەكبولات تىلەۋحاننىڭ قاتىستى بار.
"مەن كىنالى ەمەسپىن. بارلىق اقشانى بەكبولات تىلەۋحانعا جىبەردىك. بىراق وعان قاتىستى ەشتەڭە ايتىلمايدى. مەن بارلىق ينستانتسيالار بويىنشا ارىز جازدىم", - دەدى سوتتالۋشى.تاراپتاردىڭ پىكىرلەرىن تىڭداپ، سۋديا زارداپ شەككەندەردىڭ ماتەريالدىق شىعىنىن قاناعاتتاندىردى، ول، شامامەن، 250 ملن تەڭگەنى بولدى. سونىمەن قاتار، پروتسەسس بارىسىندا تۋريستىك كومپانيا ديرەكتورىنىڭ ءوز كومپانياسىن زاڭسىز اشقانى تۋرالى دالەلدەر كەلتىرىلدى.
"سوت ۇكىمىمەن سوتتالۋشى كىنالى دەپ تانىلىپ، 6 جىلعا باس بوستاندىعىنان ايىرىلدى. ول جازاسىن ورتاشا قاۋىپسىزدىك مەكەمەسىندە وتەيتىن بولادى", - دەپ ۇكىمدى سۋديا اينەل وراقباەۆا وقىدى.ەسكە سالا كەتەيىك، جىل باسىندا ءدۇيىم جۇرتتى دۇرلىكتىرگەن «كاۋسار ترەۆەل» تۋريستىك كومپانياسى جولاۋشىلاردى ويشا قاجىلىققا اتتاندىرىپ، ءوز عيماراتىنىڭ الدىندا شىر كوبەلەك اينالدىرىپ قويعان ەدى. 500-600 مىڭ تەڭگەنىڭ توڭىرەگىندە جولداما ساتىپ، 300-دەن استام ادامنىڭ كوڭىلىنە كۇدىك ۇيالاتقان تۋريستىك كومپانياعا قاتىستى تەرگەۋ جۇمىستارى باستالعانىن جازعانبىز. سونىمەن قاتار، «ادىرنا» ۇلتتىق پورتالى ماۋسىم ايىنىڭ جيىرما جەتىسى كۇنى قاجىلىققا اتتانعان 120 ادامنىڭ قۇجاتسىز قالدىرىپ، قاماۋدا وتىرعانىن دا حابارلاعان ەدى. ولاردىڭ بارلىعى "ZamZam Qazaqstan" قاجىلىق كومپانياسى ارقىلى ۇلكەن قاجىلىققا تۋر ساتىپ العان، الايدا جالعان ۆيزاعا الدانىپ، جات ەلدە جانكەشتىگە اينالعان بولاتىن.
"ادىرنا" ۇلتتىق پورتالى
Kausar travel تۋريستىك فيرماسى
قاجىلىق كومپانياسى
قاجىلار
«كاۋسار ترەۆەل»
"ZamZam Qazaqstan" قاجىلىق كومپانيا
