ەۋروپاداعى قاۋىپسىزدىك پەن ىنتىماقتاستىق ۇيىمىنىڭ (ەقىۇ) دەموكراتيالىق ينستيتۋتتار مەن ادام قۇقىقتارى بيۋروسىنىڭ ميسسياسى 8 مامىردا قازاقستانداعى كەزەكتەن تىس پرەزيدەنت سايلاۋىنىڭ ءوتۋىن باقىلاۋدى باستادى. بۇل تۋرالى بۇگىن نۇر-سۇلتاندا وتكەن ءباسپاسوز جيىنىندا ميسسيا جەتەكشىسى ۋرشۋلا گاتسەك حابارلادى. بۇل - گاتسەكتىڭ سايلاۋعا العاش قاتىسۋى. ودان بولەك ميسسيا قۇرامىندا 11 ساراپشى مەن ەقىۇ-عا مۇشە ەلدەردەن 24 ۇزاقمەرزىمدى، 300 قىسقامەرزىمدى باقىلاۋشى بار.
گاتسەكتىڭ سوزىنشە، ميسسيا قازاقستان بيلىگىنىڭ ءوتىنىشى بويىنشا كەلگەن. بيۋرو وكىلدەرى سايلاۋ اياقتالعانشا ەلدە بولادى.
بيۋرو ميسسياسى قازاقستانعا العاش رەت كەلىپ تۇرعان جوق. ءتۇرلى جىلدارى ۇيىم مۇشەلەرى ەلدەگى پرەزيدەنت جانە پارلامەنت سايلاۋلارىنا باقىلاۋ جۇرگىزگەن. 2015 جىلى وتكەن پرەزيدەنت سايلاۋىنان كەيىن جاريالانعان قورىتىندى قۇجاتتا ۇيىم سايلاۋ ناۋقانى مەن داۋىس بەرۋ كەزىندە زاڭبۇزۋشىلىقتار بولعانىن جازعان.
قازاقستاندا پرەزيدەنت سايلاۋى بيىل 9 ماۋسىمدا وتەدى. سايلاۋعا جەتى كانديدات قاتىسادى.
قازاقستاندا پرەزيدەنت سايلاۋلارى 1991, 1999, 2005, 2011 جانە 2015 جىلى وتكەن. ولاردىڭ ۇشەۋى كەزەكتەن تىس بولدى. بارلىعىندا ەلدىڭ بۇرىنعى پرەزيدەنتى نۇرسۇلتان نازارباەۆ جەڭگەن. باتىس باقىلاۋشىلارى قازاقستانداعى پرەزيدەنت سايلاۋلارىنىڭ ەشقايسىسىن حالىقارالىق ستاندارتقا سايكەس ءوتتى دەپ تانىعان جوق.
